ជាមួយភាពនឿយហត់និងស្រេកឃ្លាន បុរសអ្នកលីសែងកម្សត់ ក្រតោកយ៉ាងម្នាក់ ឈ្មោះ ស៊ីនបាដ បានទម្រេតមកលើយ៉ខាងក្រៅវិមានស្តុកស្តម្ភមួយ។ នៅពេលនោះ បង្អួចនៃវិមាន បានបើកចំហ ក្លិននំនិងគ្រឿងក្រអូបបានបណ្តាលចិត្តឱ្យគាត់នឹកចង់ដឹងថា តើខាងក្នុងម្ចាស់វិមានជាអ្នកណា។
ក្រឡេកមកលើទ្វារ ស្លាកមួយបានគូសថា ដង្ខៅដើរសំពៅ ស៊ីនបាដ។
ឃើញហើយ អ្នកលីសែងកើតតូចចិត្តណាស់ក៏ស្រែកត្អូញត្អែរចំពោះព្រះអល់ឡោះថា «ព្រះអើយ តើវាយុត្តិធម៌ទេ ដែលអ្នកខ្លះក្រពេក ហើយអ្នកខ្លះទៀតសែនប្រណីតពេក ក្នុងឈ្មោះតែមួយដូចគ្នា?»
ម្ចាស់ផ្ទះក៏ឈ្មោះ ស៊ីន បាដ ដូចអ្នកសុំទានដែរ ។ គាត់នៅអង្គុយអានសៀវភៅ ឮដូច្នេះ ក៏ឈោងទៅក្រៅរកមើលម្ចាស់សំឡេងតម្អូញ។ ភ្លាមនោះគាត់ឮមកទៀតថា «រាល់ព្រឹកព្រលឹម ខ្ញុំភ្ញាក់ឡើងដោយការឈឺចាប់និងវេទនា…ខ្ញុំរែកឥវ៉ាន់ធ្ងន់និងចេញទៅធ្វើការទៅ…ចំណែកស៊ីនបាដផ្សេងទៀតរស់នៅដោយភាពសប្បាយរីករាយ…ជាមួយបទចម្រៀងពីរោះៗម្ហូបឆ្ងាញ់ៗ និងសើចសប្បាយ…»។ ឮហើយកាលណាម្ចាស់ផ្ទះក៏សើចនិងសួរឡើងថា៖
«ហៃអ្នកនៅក្រៅ? តើអ្នកឈ្មោះអ្វីទៅ?»
ឮហើយកាលណា ជននៅខាងក្រៅក៏ក្រោកប្រញិបប្រញាប់មកឱនលំទោនឆ្លើយ៖
«ឱ! ម្ចាស់នៃទូលបង្គំ ទូលបង្គំគឺ ស៊ីនបាដ ជនជាតិហាំម៉ាល់ ហើយទូលបង្គំទទួលទានដោយលើករបស់របររបស់ជនានុជនដាក់ទូលលើក្បាលទាន!»
«ឱ! ពិតជាឈ្មោះដូចគ្នា! ខ្ញុំនឹងឱ្យអាហារ ថែមបរិច្ចាគសម្លៀកបំពាក់ខ្លះដល់អ្នក! តែនេះមិនមែនមកពីយើងមានឈ្មោះដូចគ្នាទេ តែមកពីខ្ញុំក៏ធ្លាប់កម្សត់ក្រីក្រជាច្រើនលើកមកហើយ!»
«ឱ! តើលោកម្ចាស់មានការតស៊ូដូចម្តេចខ្លះទៅទើបបានទទួលផលកម្រិតនេះ?!»
ទទួលបានសំណួរនេះពីអ្នកទុគ៌តកាលណា អ្នកជំនួញដើរសំពៅបានឆ្លើយតបវិញដោយដង្ហើមធំថា៖
«ខ្ញុំអាចនៅរស់ និងក្លាយជាអ្នកមានមកទល់ពេលនេះ ដោយសារវាសនាតែប៉ុណ្ណោះ!»
ក្រោយមក នារីទាសករម្នាក់ក៏បានលើកអាហារមកឱ្យហើយម្ចាស់ផ្ទះបានផ្តើមនិទានថា៖
«ចូរអ្នកបរិភោគឆ្អែតនិងស្តាប់បណ្តើរៗនូវបណ្តារឿងរ៉ាវនៃជីវិតតស៊ូរបស់ខ្ញុំ!»
ការធ្វើដំណើរដំបូងរបស់ស៊ីនបាដជាអ្នកជំនួញតាមសំពៅ
ឪពុករបស់ខ្ញុំជាពាណិជ្ជករដ៏ជោគជ័យម្នាក់ ដែលបន្សល់ទុកខ្ញុំនូវទ្រព្យសម្បត្តិនិងគំរូលើកទឹកចិត្តសម្រាប់ការផ្សងព្រេងបង្កើតកេរ្តិ៍តំណែល។
ដោយខ្ញុំនៅក្មេង ក្បាលរឹង និងល្ងង់ខ្វះពិសោធន៍ ខ្ញុំចូលចិត្តពិធីជប់លៀងនិងដើរលេង ដោយគិតថា ជីវិតគ្មានអ្វីត្រូវព្រួយទេ ខ្ញុំនឹងបន្តវិធីដដែលៗនោះពេញមួយជីវិត។ តែមកដល់ថ្ងៃមួយ ពុកស្លាប់បាត់ ខ្ញុំភ្ញាក់ខ្លួនឡើង ឃើញថាលុយជិតអស់ហើយ។ ពេលនោះ ខ្ញុំនឹកឃើញពាក្យឪពុកខ្ញុំគាត់ធ្លាប់និយាយថា៖ «នៅក្នុងផ្នូរដូចល្អជាងនៅក្នុងភាពក្រីក្រ» ហើយខ្ញុំបានមកដល់អារម្មណ៍ប្រថុយប្រថានចេញជួញដូរ។ ខ្ញុំបានប្រកាសនិងប្រមូលលក់ចោលនូវសូត្រនិងសម្លៀកបំពាក់ដ៏ល្អទាងអស់ ប្រមូលយក ទ្រព្យសម្បត្តិរបស់ខ្ញុំ ទិញទំនិញសម្រាប់ការធ្វើដំណើររកពាណិជ្ជកម្ម ពនេចរតាមសមុទ្រ។
កាលណោះខ្ញុំឡើងលើកប៉ាល់ជាមួយអ្នកជំនួញមួយក្រុម។
យើងចេញដំណើរក្នុងគោលដៅឆ្ពោះទៅកាន់ទីក្រុងបាសា ជាក្រុងអ៊ូអរប្រមូលផ្តុំវត្តុមានតម្លៃ ខ្វាត់ខែងដោយទីប្រជុំជន កំពង់ផែធំ មនុស្សមកពីគ្រប់ប្រទេសចួបជុំគ្នារកស៊ីជួញប្រែ។ នៅលើកម្រាស់ទឹក យើងបានធ្វើដំណើរជាច្រើនថ្ងៃទាំងយប់ ដោយប៉ះសំចតតាមកំពង់ផែ និងបណ្តាកោះ។
គ្រប់ទីកន្លែងដែលយើងទៅដល់ដី យើងបានទិញនិងលក់ ផ្លាស់ប្តូរទំនិញ ជួញដូរចុះឡើងបង្កើនទ្រព្យសម្បត្តិបន្តិចម្តងៗដោយភ្ញាក់ផ្អើលនិងរីករាយ។
នៅទីបំផុត យើងបានមកដល់កោះដ៏ស្រស់ស្អាតបំផុតមួយ។ នៅទីនេះ មានដំណាំហូបផ្លែ និងពូជផ្កាចម្លែកៗធំៗរីកស្គុះស្គាយ ដូចជាគ្រាប់ពូជត្រូវបានទម្លាក់ចុះមកពីសួនច្បារនៃឋានសួគ៌។ ក្លិនក្រអូបនិងចម្រុះពណ៌ទាក់ទាញពីចម្ងាយ។
ប្រធាននាវិកទម្លាក់យុថ្កា ហើយដាក់បន្ទះចុះចត។ មនុស្សគ្រប់គ្នានៅលើយានបានឡើងស្រមកលើច្រាំងសមុទ្រក្នុងអារម្មណ៍ថា សូម្បីខ្សាច់ក៏ជាពំនូកមាសពិតៗនៅចន្លោះម្រាមជើងរបស់ពួកយើង។
គេនិងខ្ញុំសែនរំភើបរត់ត្របាញ់ ហើយរីករាយនឹងផ្ទៃដីដ៏ខៀវស្រងាត់ស្ងប់ស្ងាត់ក្រអូបលលៃ។ អ្នកដំណើរខ្លះ ផ្តើមដុតភ្លើងធ្វើម្ហូប អ្នកខ្លះទៀតបោកខោអាវ។ ពួកយើងមួយចំនួនទៀត បានផ្តើមរុករកជុំវិញកោះ ខណៈអ្នកខ្លះផឹកស្រានិងលេងតន្រ្តី។
រំពេចនោះ កណ្ដឹងរបស់កប៉ាល់លាន់មកយ៉ាងទ្រហឹង។
នៅពេលយើងផ្ចង់ស្តាប់ នាវិកម្នាក់ដែលយាមនៅលើកំពូលនៃនាវាព្យាយាមប្រកូកស្រែកថា៖
«គ្រប់គ្នារត់! រត់! រត់!»
សូមព្រះអល់ឡោះជួយ! ខ្ញុំស្រឡាំងកាំង ខណៈមេនាវិកស្រែកភ្លាត់សំឡេង៖
«ទម្លាក់ចោលឧបករណ៍គ្រប់យ៉ាង ហើយបកត្រលប់ឡើងកប៉ាល់វិញ! ឥឡូវ!»
យើងមានអារម្មណ៍ថាដីហុយទ្រលោម ឯសមុទ្រដ៏ស្ងប់ស្ងាត់ បានផ្តើមបោករំជួលវិលជារង្វង់ទឹកយក្សជុំវិញកោះ នាំមកនូវរលកធំៗបោកបក់សំដៅមកច្រាំង។
ពេលនោះ កណ្តាលកោះបានរួញឡើងជាពំនូក បណ្តាលឱ្យអ្នកដែលមិនបានត្រលប់ទៅលើកប៉ាល់ទាន់នោះចាប់ផ្ដើមរអិលចុះទៅក្នុងទឹកសមុទ្រ។
ខ្ញុំក៏នៅក្នុងចំណោមពួកគេ។
ពេលខ្ញុំដួលប្រូងទៅក្នុងទឹកងងឹតស្លុបភាន់ភាំងដៃរបស់ខ្ញុំស្រវាចាប់កាន់បានទ្រុងកំប្លោកឈើសម្រាប់បោកគក់ ហើយរបស់នេះបានជួយជីវិតខ្ញុំ ខ្ញុំក៏តោងទៅលើវា។ រលកបានបោកបក់ខ្ញុំទៅមក ពេលដែលនាវាបានបោលចោល ឯខ្ញុំនៅអណ្តែតតែលតោលម្នាក់ឯង។
ឥឡូវនេះមើលពីទឹកទៅ ខ្ញុំឃើញថា កោះដែលយើងបានចុះចត មុននេះ តាមពិតកំពុងទូងនៅលើ ខ្នងត្រីបាឡែនមហស្ចារ្យដ៏ធំសម្បើមបំផុតមួយ។ ខ្សាច់មាសបានគ្របស្រោចលើខ្នងវា ហើយដើមឈើនិងបន្លែដុះនៅលើខ្នងរបស់វាដែរ។
សត្វនេះត្រូវដេកនៅស្ងៀមអស់ជាច្រើនឆ្នាំ ប៉ុន្តែនៅពេលពួកយើងចុះមកលើខ្នងវាយើងខ្លះចាប់ផ្ដើមដុតសាច់និងបង្កាត់ភ្លើងដាំទឹក ច្បាស់ជាបានរំខានវា ហើយដាស់វាឡើងពីដំណេកយ៉ាងកំរោល។
មិនមែនក្រោកមកស្ងៀមទេ សត្វមិនធ្លាប់មាន បានបក់កន្ទុយវាយទឹក ហើយរលកដ៏ធំៗបំផុត បានបក់មកលើខ្ញុំ និងបោកបញ្ជូនខ្ញុំទៅឆ្ងាយឡើងៗពីច្រាំងនោះ។
ដោយគ្មានឱកាសបានចួបកប៉ាល់វិញ ខ្ញុំផ្តើមអស់សង្ឃឹម។ រហូតដល់យប់មកដល់ អាកាសចុះត្រជាក់ ហើយខ្ញុំបានស្រែកយំ តែត្រៀមរៀបចំខ្លួនដើម្បីសេចក្ដីវិនាសរបស់ឆាកជីវិតខ្ញុំ។
ប៉ុន្តែព្រឹកឡើងខ្ញុំឃើញខ្លួនឯងមិនបានស្លាប់ ត្រឹមសន្លប់ និងកំពុងអណ្តែតតម្រង់ទៅកាន់ទីច្រាំងកោះដ៏ខ្ពស់មួយ។ ខ្ញុំបានខ្វាយចែវសំដៅ និងប្រតោងឡើងទៅលើ ទាំងកម្លាំងជើងចង្អៀត ស្ពឹក។ ឡើងដល់កាលណា ខ្ញុំដួលទន់មកលើដីដូចមនុស្សស្លាប់ ហើយដេកបិទភ្នែកចោលរាងកាយយ៉ាងយូរ។
មិនយូរប៉ុន្មាន ភ្លៀងធ្លាក់មកស្រោចមុខនិងរាងកាយអត់អាហារ ធ្វើឱ្យការល្ហិតល្ហៃបានសម្រាលខ្លះ ខ្ញុំដឹងខ្លួនសន្សឹមៗរួចសម្គាល់បានថា នេះតំបន់ជាយព្រៃជាព្រោះឃើញមានគ្រាប់ផ្លែប៊ឺរី និងបឹងមួយស្រងាត់មានទឹកថ្លានៅមិនឆ្ងាយ។
និទាឃរដូវនេះ បានធ្វើឱ្យខ្ញុំមានអារម្មណ៍ថា បានរស់ឡើងវិញហើយ។
ខ្ញុំចាប់ផ្ដើមមានកម្លាំងលូនទៅរកទឹកលេប និងរើសបណ្តាផ្លែផល្លាសល់ពីសត្វមកហូបចម្អែត។ ផ្លែណាមិនមានស្នាមសត្វឆី ខ្ញុំមិនហ៊ានហូបឡើយ។
មិនយូរទេក្រោយមានកម្លាំងដើររុករកលើកោះក៏បានសម្គាល់ឃើញថា នេះជាកន្លែងដ៏រីករាយមានផ្លែឈើស្លូត ផ្អែម មានឱជារសច្រើនប្រភេទ។
បន្ទាប់ពីដើរចច្រប់មួយរយៈ ខ្ញុំចាប់បានគ្រោងនៃស្រមោលមានជីវិត។
ខ្ញុំប្រុងប្រយ័ត្នជាខ្លាំង ព្រោះបើជាសត្វចម្លែកទៀត ខ្ញុំមិនដឹងដោះស្រាយរបៀបណាទេ។ ពេល សំងំពួន ខ្ញុំបានឃើញស្រមោលនោះខិតមកជិត។
តាមពិតព្រះអើយ ខ្ញុំឃើញវាជាសេះដ៏ស្រស់ស្អាតនិងថ្លៃថ្នូរ ដែលត្រូវបានចងទុកក្បែរដើមឈើធំមួយនៅលើឆ្នេរ។ ខ្ញុំបានដើរទៅក្បែរដោយក្តីស្រលាញ់។
វាពិតជាសេះដ៏ប្រណីត។ ខ្ញុំប្រមូលរើសស្មៅវែងៗបែតងខ្ចីៗដែលនៅសំណើមដោយទឹកសន្សើមពេលព្រឹក យកបញ្ចុកវា។ សេះនេះជាមេដ៏ស្លូតបូតនិងគួរឱ្យស្រឡាញ់។ សត្វបានលេបស្មៅទាំងពួងពីលើបាតដៃរបស់ខ្ញុំ។
ខ្ញុំពិតជារីករាយនិងផ្គត់ផ្គង់សេះញី។
មិនយូរប៉ុន្មាន សេះស្រាប់តែលែងបរិភោគ ដូចជាមានអ្វីមួយធ្វើឱ្យវាភ្ញាក់ផ្អើល។ សេះមេ បានឈានមកពួនក្រោយគល់ឈើដោយទាញបន្តឹងខ្សែពួរ ក្រឡេកមើលជុំវិញកញ្ជ្រោលភ័យ។
ខ្ញុំក៏ភ័យស្លុត ព្រោះនៅឯឆ្នេរ សេះយក្សមួយក្បាលរាងជាពួកសេះសមុទ្រពណ៌សកំពុងបង្ហាញខ្លួនតម្រង់មកជាមួយភាពឃោរឃៅកំណាច។
ខ្ញុំភ័យស្លន់ស្លោដូចសត្វឈ្មោលប្រុងនាំសេះញីទៅ តែមិនមិនអាចទៅរួចនេះ ក៏រត់ត្រលប់ទៅរកគែមព្រៃពួនសម្ងំយកសុខ។ ពីទីនោះ ខ្ញុំបានឃើញថា មេសេះសមុទ្របានញ៉ុកខ្សែពួរនៅក្នុងមាត់របស់វា ហើយកំពុងអូសកូនសេះញីយកចូលទៅក្នុងសមុទ្រ ដែលប្រាកដជានឹងលង់ទឹកស្លាប់។
ទិដ្ឋភាពនេះ ពេញបេះដូងខ្ញុំផ្ទុកដោយសេចក្តីអាណិត។
ខ្ញុំទ្រាំមិនបានទេ ក៏រើសដំបងមួយធំគួរសម រត់ត្រលប់ទៅឆ្នេរវិញ ចាប់ផ្តើមវាយមេសេះសមុទ្រតម្រង់ក្បាល។ ប្រសិនភ្លាត់ វាច្បាស់ជាងាកមកទាត់ខ្ញុំរហូតដល់ស្លាប់ ប៉ុន្តែដោយខ្ញុំស្លន់ខ្លាំងណាស់ ខ្ញុំវាយមិនបើកភ្នែកមិនដកដៃរហូតដល់វាខ្លាចពេក ដកថយទុកសេះញីចោល។
ពេលសត្វកំណាចទៅបាត់ក្រោមទឹក សេះញីនៅតែភ័យតក់ស្លុតឈររញីរញ័រ ប៉ុន្តែខ្ញុំបានយកខ្សែពួរទាញវាមកក្បែរ ហើយវាក៏ធម្មតាវិញ។
ប៉ុន្មាននាទីក្រោយមកខ្ញុំបានឮសម្រែកបុរសម្នាក់ ដែលមើលមិនឃើញ ស្រែកពីមាត់សមុទ្រមកថា៖
«តើអ្នកជានរណា ហើយអ្នកមកពីណា?»
«អ្ហេ៎ សំឡេងអ្នកណា? ខ្ញុំគឺជាអ្នកជំនួញស៊ីនបាដមកពីបាកដាដ! ព្រះអល់ឡោះបានថែរក្សានិងបញ្ជូនខ្ញុំមកទេ! ប្រាប់ខ្ញុំវិញមក អ្នកជាអ្នកណា?»
សំឡេងដដែលតបឆ្លើយថា៖
«ខ្ញុំជារាជបុត្រា ជាម្ចាស់សេះនេះ!»
ការបង្ហាញខ្លួនពីរាជទូកមួយលឹមៗបង្ហាញថា ជាសំណាងដ៏អស្ចារ្យរបស់ខ្ញុំហើយ។ ពិតដូច្នេះមែន ពេលបានមកយកសេះសំណព្វត្រលប់ទៅវិញហើយ រាជបុត្រាបានដឹងគុណដែលខ្ញុំសង្គ្រោះសត្វរបស់ទ្រង់។
ទ្រង់បាននាំខ្ញុំយកទៅរាជធានីនិងចូលព្រះបរមរាជវាំងគាល់ព្រះរាជាមីហ្រ្យាណ។
នៅពេលដែលស្តេចនគរនេះ បានសណ្តាប់សព្ទសាច់រឿងរបស់ខ្ញុំទ្រង់មានព្រះទ័យភ្ញាក់ផ្អើលហើយរាជតម្រិះក្រោយមកចេញបន្ទូលថា៖
«ស៊ីនបាដកម្សត់អើយ! ដោយគុណអល់ឡោះ អ្នកពិតជាត្រូវបានថែរក្សាដោយអព្ភូតហេតុ! ជោគវាសនា កំណត់អាយុវែងទៅមុខនិងសំណាងសម្រាប់អ្នក ដោយជឿថាអ្នកជាមនុស្សល្អ ដែលបានទទួលការអនុគ្រោះពីព្រះ ខ្ញុំនឹងប្រព្រឹត្តចំពោះអ្នកដោយសប្បុរស។ ពិតប្រាកដណាស់ យើងនឹងផ្តល់ការងារឱ្យខ្ញុំអ្នកគ្រប់គ្រងអ្នកជំនួញនៅកំពង់ផែ ចុះបញ្ជីនាវាទាំងអស់!»
ខ្ញុំទទួលបានការងារ កម្រៃនិងទីកន្លែងស្នាក់នៅយ៉ាងអឹកអធិក។
ជាងមួយឆ្នាំ ដំណើរការនៃជីវិតជាមេកំពង់ផែនេះផុតក្តីព្រួយអ្វីទាំងអស់។ រហូតដល់សម័យ ថ្ងៃមួយ កប៉ាល់ដែលខ្ញុំបានជិះមកពីផ្ទះ បានមកដល់និងសំចតចំផែរបស់ខ្ញុំ។ ប្រធានក្រុមនាវិក បានចំណាំស្គាល់ខ្ញុំភ្លាមៗ ហើយស្ទុះស្ទាមកឱបខ្ញុំនៅក្នុងរង្វង់ដៃរបស់គាត់។
គាត់បាននិយាយថា៖
«ទំនិញរបស់អ្នកនៅតែមានសុវត្ថិភាពនៅក្នុងកប៉ាល់របស់ខ្ញុំ»។
«នេះគឺជាដំណឹងល្អដែលមិននឹកស្មានដល់បំផុត សូមអរគុណដល់អល់ឡោះ»
ខ្ញុំបានថ្វាយទំនិញនោះ ជាអំណោយដល់ស្តេចបង្ហាញពីកតញ្ញូតាធម៌ ហើយភ្លាមៗនោះដែរដោយសារការពេញចិត្តភាពស្មោះត្រង់នេះ ព្រះអង្គបានប្រទានអំណោយជាទ្រព្យដែលមានតម្លៃម្ភៃដងនៃទំនិញខ្ញុំ។ ខ្ញុំបានលាអ្នករាល់គ្នាចេញមកដោយទឹកភ្នែក ហើយជិះបកត្រលប់ទៅក្រុងបាសា ជាកន្លែងដែលខ្ញុំបានបន្តជំនួញត្បូងនិងព្រំមានតម្លៃ ចំណេញជាងដប់ដងបន្ថែមទៀតពីទីផ្សារ។
ដូច្នេះហើយជាងមួយខែក្រោយ ខ្ញុំបានត្រលប់ទៅក្រុងបាកដាដវិញក្នុងនាមជាអ្នកមានស្តុកស្តមហើយ បានទិញមហាវិមាននេះ លោះយកមកនូវអ្នកបម្រើជាច្រើននាក់ ថែមបានបង្កើតឡើងនូវកន្លែងដ៏អស្ចារ្យមួយ ដូចអ្នកឃើញស្រាប់សម្រាប់រស់នៅ។
មិនយូរប៉ុន្មានក៏ចាប់ផ្តើមបំភ្លេចនូវអ្វីដែលខ្ញុំធ្លាប់បានរងទុក្ខកាលរសាត់ក្នុងព្រៃរហោដ្ឋាន។
នេះជារឿងអព្ភូតហេតុដំបូងរបស់ខ្ញុំ បើថ្ងៃស្អែកចួបអ្នក ខ្ញុំនឹងប្រាប់អ្នកពីដំណើររឿងទីពីរនៃការធ្វើដំណើរទាំងប្រាំពីរលើករបស់ខ្ញុំ។ ថាចប់ហើយ អ្នកជំនួញស៊ីនបាដ បានផ្តល់ឱ្យស៊ីនបាដជាអ្នកលីសែងនូវកាក់មាស១០០ សម្រាប់ពេលវេលាមិនបានធ្វើការងារពេញមួយព្រឹកនេះ។
ស្អែកឡើង…អ្នកលីសែងបានវិលមកវិញហើយសុំឡើងថា៖
«ឱ! ខ្ញុំពិតជាទន្ទេញចង់ដឹងនូវដំណើរជាបន្តបន្ទាប់ទៀតរបស់លោកម្ចាស់! ខ្ញុំគេងមិនលក់ពេញមួយយប់ដោយការចង់ដឹង!»
ស៊ីនបាដញញញឹមហើយឆ្លើយថា៖
«មិត្តរបស់ខ្ញុំ! មនុស្សយើងធ្លាប់ធ្វើការងារ ខ្ញុំមិនអាចសម្រាកបានយូរទេ។ ខ្ញុំបានភ្លក់ខ្យល់អំបិល និងភាពរំភើបនៃការធ្វើដំណើរឆ្ងាយ ក៏ដូចជាជីវិតផ្សងព្រេង។ មិនយូរប៉ុន្មានខ្ញុំត្រូវបានទាញចិត្តដោយព្រះហឫទ័យរបស់អល់ឡោះឱ្យឃ្លាននឹកចង់ត្រលប់ទៅកំពង់ផែ ចង់ដើរសមុទ្រទៅបាសាទៀត!»
លើកនេះ ខ្ញុំបានទិញយកកប៉ាល់ធំមួយដែលទើបនឹងបង្កើតថ្មីជាមួយបច្ចេកវិទ្យាកែច្នៃដ៏រឹងមាំល្អ និងឧបករណ៍ត្រួតពិនិត្យអាកាសធាតុដែរ។
ប្រធាននាវិកដែលធ្វើការឱ្យខ្ញុំ បានជួយប្រមូលយកក្រុមឈ្មួញសម្រាប់ការចេញធ្វើដំណើរជាមួយគ្នាហើយខ្ញុំទទួលបានកម្រៃទ្វេ។
ទៅដល់បាសា ខ្ញុំបានចេញពីទូកឡើងទៅទីប្រជុំជននិងផ្សារទិញទំនិញសម្រាប់ដំណើរការលក់ដូរមួយរយៈ។ បន្ទាប់មកក្រុមយើង ឡើងជិះនាវាចល័តពីកោះមួយទៅកោះមួយ នគរមួយទៅនគរមួយក្នុងលក្ខខណ្ឌអាកាសធាតុល្អ។
គ្រប់ទីកន្លែងដែលយើងទៅដល់ យើងបានរកឃើញក្រុមឈ្មួញថ្មី និងដឹងពីអ្វីៗប្លែកៗគ្នាដែលអតិថិជនចង់បាន។
ចុងក្រោយទីបំផុត យើងបានមកដល់កោះដ៏សុខសាន្ត ដែលស្ងប់និងគ្មានសញ្ញានៃសំឡេងឬភូមិករអ្នកស្រុក។
វាសមជាទីកន្លែងដ៏គួរឱ្យស្រលាញ់វៀរចាកភាពអ៊ូអរ ពេញដោយដើមឈើពណ៌បៃតង សត្វស្លាបគ្រប់ប្រភេទសុខដុម មានស្លាបរោមពណ៌ភ្លឺ និងទឹកធ្លាក់ជាជ្រោះយ៉ាងត្រជាក់មនោរម្យ។
ខ្ញុំបានដើរជុំវិញកោះ សោយសុខនឹងធម្មជាតិកម្រ ហើយសំចតលើផ្ទាំងថ្មល្អាងមួយជាកន្លែងរីករាយញ៉ាំអាហារថ្ងៃត្រង់ដែលខ្ញុំបានស្ពាយយកមកជាមួយ។
បន្ទាប់ពីខ្ញុំបានពិសាអាហាររួចហើយក៏ទន់ភ្នែកបិទដេកលក់យ៉ាងស្លុងនិងសុខា។ ពេលភ្ញាក់ឡើងមិនដឹងថ្មើរណាទេ មេឃប្តូរងងឹតទៅហើយ។ ដោយមានអារម្មណ៍ថាមិនស្រួល ខ្ញុំប្រញាប់ត្រលប់ទៅរកឆ្នេរវិញ តែទម្រាំមកដល់ច្រាំងវិញអ្នករួមដំណើររបស់ខ្ញុំបានបាត់ទាំងអស់។
សំពៅរបស់ខ្ញុំបានចាកចេញពីទីចត សល់តែសំបកផ្លែឈើដែលពួកគេបានបរិភោគ ហើយសំណល់ផ្សែងដែលគេដុតសម្រាប់ធ្វើម្ហូប។
ដោយមិនដឹងថា គេចួបគ្រោះអ្វីបានជាចាកចេញដោយប្រថុចញ៉ុច ឥឡូវខ្ញុំអង្គុយកម្សត់នៅមាត់ច្រាំង ហើយមើលទៅសមុទ្រ។
គ្រប់ពេលដែលខ្ញុំរំពឹងថានឹងឃើញកប៉ាល់បកត្រលប់មកវិញ មិនបានកើតឡើងទេ។ នាវិក និងពាណិជ្ជកររួមគ្នាបំភ្លេចខ្ញុំចោល។ ទឹកភ្នែកបានហូរចូលសស្រាក់នៅពេលដែលខ្ញុំត្រិះរិះគិត អំពីឆាកជីវិតស្តុកស្តមនៅក្រុងបាកដាដ។ ផ្ទះដ៏ល្អរបស់ខ្ញុំ ខ្នើយសូត្រនៅលើគ្រែរបស់ខ្ញុំ ទឹកហូរ ក្លិនបុស្បានៅក្នុងទីធ្លាសួនរបស់ខ្ញុំ ពេលនេះ ខ្ញុំបានស្គាល់វិញដែរទេ។
មួយថ្ងៃពេញមក ខ្ញុំស្រេកឃ្លានណាស់ ហើយនឹកដល់ក្លិនសាច់អាំងពីផ្ទះបាយរបស់ខ្ញុំ អ្នកបម្រើរបស់ខ្ញុំ មិត្តរបស់ខ្ញុំ គ្មានទៀតទេ ភាពប្រណីតដែលខ្ញុំធ្លាប់ក្តាប់ក្តោប។
ឥឡូវនេះខ្ញុំដេកយំកើយស្លឹកឈើ ពោះទទេនៅលើកោះ និងវាលខ្សាច់គ្មានមនុស្ស។ កំពុងស្រែកយំ ស្រក់ទឹកភ្នែករហាម មានអារម្មណ៍ថា អ្វីមួយបានបន្ទោសភាពកំសាករបស់ខ្ញុំ។ គំនិតចចេសបានលេចឡើងមកក្នុងក្បាល ធ្វើឱ្យខ្ញុំត្រូវបញ្ឈប់ការយំយែក ហួសចិត្តនឹងវាសនាទាំងអស់នេះ ហើយទាញខ្លួនឯងក្រោកដើរត្រលប់ទៅរកកន្លែងផ្ទាំងថ្ម និងដើមឈើខ្ពស់ដែលខ្ញុំបានស្លុងដេក។
ខ្ញុំចាប់កាន់មែកឈើមួយ ហើយទាញខ្លួនខ្ញុំយោងឡើងទៅលើសម្រាក។ បន្ទាប់មក ខ្ញុំក៏ឡើងចុះ ចុះឡើងជុំវិញដើមឈើរហូតដល់មានគំនិតថ្មី គឺឡើងឱ្យដល់កំពូល។
ពីទីនោះខ្ញុំបានស្ទង់មើលទិសតំបន់ជុំវិញកោះ។ ខ្ញុំមិនអាចមើលឃើញផ្សែងហុយ ឬសញ្ញាណាមួយនៃភូមិករឬជីវិតមនុស្សទេ។ ប៉ុន្តែខ្ញុំបានឃើញអ្វីមួយស ស្គុស និងធំយ៉ាងចម្លែក។
មើលហើយមើលទៀតគិតថា អាចជាប្រភេទអគារបុរាណរឹងមាំដ៏ធំរលោងនិងស។ ពេលខ្ញុំពិនិត្យឱ្យបានដិតដល់ជាងនេះ ចិត្តប្រាប់ថា វាដូចជារាជវាំង។
ខ្ញុំត្រេកអរ នឹកគុណព្រះ ហើយបានវារនិងលោតចុះទៅដីរត់រកផ្លូវវែកសំដៅទៅទិសដៅខាងលើ។ ប្រហែលមួយហត់ ខ្ញុំទៅដល់ទីនោះ។ តាមពិតវាមានកម្ពស់ទាល់តែងើយផុត ទើបអាចមើលសព្វ។ មិនអាចមើលដឹងថាជាប្រាសាទឬសំណង់ប្រភេទអ្វីទេ ខ្ញុំបានដើរនិងរត់ជុំវិញជិត៥០ ជំហាននៅតែមិនប្រទះឬរកឃើញទ្វារ។ មានអារម្មណ៍ថាវិមាននេះតាមពិតរាង ដូចជាសំបកស៊ុត?
ហត់ពេក ខ្ញុំបានអង្គុយចុះមួយសន្ទុះ។
មិនយូរប៉ុន្មាន ល្ងាចចូលមកដល់ មេឃប្រែជាងងឹត។ ដំបូងខ្ញុំគិតថា ប្រហែលជាមានពពកព្យុះធំមួយបក់មកលើកោះនេះ ប៉ុន្តែពេលខ្ញុំមើលឡើងលើក៏ស្លុតស្មារតីដឹងថា តាមពិតពពកគ្របងងឹតនេះ គឺជាសត្វស្លាបធំខ្នាតយក្សមួយសឹងធំជាងសំពៅទៀត។
កាលខ្ញុំដេក ប្រហែលជានាវិកយើងឃើញវាបានជាពួកគេចាកចេញចោលខ្ញុំប្រាស់យកជីវិត។
ឥឡូវនេះ ស្លាបរបស់មាហាបក្សីបានបក់បោក នាំមកជាកម្លាំងខ្យល់រង្គើអស់សព្វមែកឈើ និងស្លឹកធំតូច។ ខ្ញុំរត់ផាស់ក្រញាំទៅពួនក្នុងព្រៃ ព្រោះសត្វចម្លែកឆ្វែកចុះមកលើដីហើយ។
ខ្ញុំដឹងហើយថា កន្លែងសខ្ពស់មិនមានច្រកចូលនោះ តាមពិត មិនមែនជាសំណង់តែជាស៊ុតរបស់វា។
ខ្ញុំអស់សង្ឃឹមក្នុងការមានជីវិតចាកចេញពីកោះដែលស្ងាត់ជ្រងំនេះ។ តែបំណាច់នឹងស្លាប់ ខ្ញុំសុខចិត្តព្យាយាមជាមួយ គំនិតដ៏ឆ្កួតលីលាបំផុតមួយគឺ លូនចេញពីកន្លែងលាក់ខ្លួនសំដៅទៅរកបក្សីដែលកំពុងសម្រាក។
ពេលខ្ញុំទៅដល់ហើយ ខ្ញុំបានលបសសៀរឡើងទៅលើក្រញាំជើងដ៏ធំរបស់វា ដោយប្រើក្រណាត់ជួតពីលើក្បាលខ្ញុំចងខ្លួនឯងនឹងជើងវា។
វាមិនដឹងខ្លួនទេ។ នៅទីនោះខ្ញុំបានចំណាយពេលពេញមួយយប់ដែលវាមិនហើរទៅណាហើយដេកសំងំដោយអារម្មណ៍លំបាកបំផុតមិនធ្លាប់ចួបប្រទះក្នុងជីវិតរបស់ខ្ញុំ។ លុះព្រឹកឡើង បក្សីភ្ញាក់ពីដំណេក ហើយចាប់ផ្តើមលាតស្លាបយ៉ាងមហិមាផ្អើលអស់ធម្មជាតិ។
បន្ទាប់មកវាចាប់ផ្តើមផ្លុំទទះស្លាបបណ្តាលឱ្យមានខ្យល់បក់ខ្លាំងមុនពេលត្រដាងស្លាបហោះឡើងខ្ពស់ទៅលើអាកាស។ ខ្ញុំអាចមើលឃើញកោះនៅពីក្រោមនិងសមុទ្រខៀវស្រងាត់។ យើងហោះឆ្លងកាត់រលក រហូតដល់ដីភ្នំមួយជួរ។
មិនយូរប៉ុន្មាន ខ្ញុំអាចមើលឃើញយ៉ាងតក់ស្លុតនូវបន្ទះភ្នំភ្លើងមួយធំ ដែលចង្អុលឡើងមកលើដោយមានផ្សែងហ៊ុយនិងកម្អែលក្តៅគគុក។ ជុំវិញនោះជាវាលរហោដ្ឋាន ថ្មភ្លើងកម្អែលបន្ទុះ គ្មានទេវត្ថុមានជីវិត។ សត្វស្លាបយក្សានេះហោះយូរហើយ នៅតែឆ្លងមិនទាន់អស់ បញ្ជាក់ថាវាលនេះ ធំធេងណាស់។ សម្លឹងយូរៗទៅ ខ្ញុំចាប់ផ្តើមយំស្តាយ។
ប្រសិនណាជាខ្ញុំមុននេះមិនចេញមកតាមក្រញាំបក្សី ដោយបន្តសំងំស្នាក់នៅលើកោះ យ៉ាងហោចណាស់ក៏មានដើមឈើជ្រក ទឹកធ្លាក់សម្រាប់ងូត មិនលែងអីមានផ្លែព្រៃឬសត្វព្រៃសម្រាប់ចម្អែត ពេលនេះខ្ញុំឃើញតែកំអែលភ្នំភ្លើងនិងរហោដ្ឋាន ឯណាពិភពលោក ឯណាមនុស្ស?
ទោះយ៉ាងណាបក្សីយក្សាដូចបានស្គាល់ទីតាំងភូមិសាស្ត្រច្បាស់ថ្នឹក។ ភាពអស់សង្ឃឹមរបស់ខ្ញុំមិនទាន់បានបន្តិចផង វាក៏ត្រដាង ទទះនិងចាក់គួរចុះចត។
គោលដៅជាល្អាងជ្រោះជ្រៅមួយ។
គ្រប់យ៉ាងមានពណ៌បៃតងស្រស់ ខុសប្លែកពីតំបន់កម្អែលមុននេះ។
ភាពរស់រវើកនៃធម្មជាតិ បញ្ចេញថាមពលពេញទៅដោយមហិទ្ធិឫទ្ធិសាងកម្លាំងចិត្តនិងបានបណ្តាលឱ្យខ្ញុំរីករាយភ្លេចអស់បណ្តាទុក្ខព្រួយ ដោយគ្រាន់តែបានឮសូរទឹកជ្រោះនិងសព្ទសត្វបក្សីខ្ញៀវខ្ញា សប្បាយ។
ដោយបានត្រៀមខ្លួនជាស្រេច ខ្ញុំបានដោះខ្លួនយ៉ាងរហ័ស មិនទុកសញ្ញាអ្វីឱ្យបក្សីដឹងថាមានខ្ញុំមកជាមួយឡើយ។
រួចផុតពីជើងរបស់បក្សីហើយ ក៏ប្រញាប់មុជទៅពួននៅពីក្រោយផ្ទាំងថ្មធំមួយ បិទបាំងបំពួនរកឱកាស។
ពីទីនោះ ខ្ញុំបានក្រឡេកមើលជ្រលងដែលយើងបានមកដល់នេះ នៅផ្នែកម្ខាងៗជាជញ្ជាំងដ៏ចោត ដែលខ្ពស់ពេកណាស់សម្រាប់មនុស្សអច្ឆរិយៈណាអាចឡើងចុះតាមមាត្រដ្ឋាននេះបាន។
ប៉ុន្តែ ដីក្រោមជើងរបស់ខ្ញុំបានធ្វើឱ្យមានអារម្មណ៍ថា….ប្លែក….គ្រើមនិងត្រជាក់?
ភាពអស្ចារ្យខុសប្លែកពីគេដែលធ្វើឱ្យខ្ញុំសឹងស្រវាំងភ្នែក ពោលគឺពេលឱនទៅពិនិត្យ ទីនេះមិនមែនមានគ្រួសដូចបានស្មានពីដំបូងទេ ប៉ុន្តែជាពំនូកត្បូងពេជ្ររន្ទាល។
នៅក្រោមបាតជើងខ្ញុំជាដីដែលដុះមកសុទ្ធជាគ្រាប់ពេជ្រ។
ជារឿងមួយដែលស្ថិតក្នុងកាលៈទេសៈតឹងតែង ធ្វើឱ្យខ្ញុំអាចបំពេញចិត្តដោយម៉ឺនសែនអំណរ។ ថ្មទីនេះងាកទៅពិនិត្យទីណាក៏មានលាយឡំពន្លឺភ្លឺចែងចាំង ព្រោះវាត្រូវបានលាយជាមួយគ្រាប់ពេជ្រតូចធំ រាប់មិនអស់។ ឱ! កុំថាខ្ញុំជាគហិបតីជួញដូរថ្នឹកស្ទាត់ សមណាតែរាស្ត្រធម្មតាក៏ស្គាល់ថាជាកំណប់ត្បូងពេជ្ររន្ទាលដ៏មានតម្លៃសម្បើមកប្បការ។
គ្រាន់តែដីនេះមួយពំនូកដៃ ក៏អាចធ្វើឱ្យខ្ញុំត្រលប់ទៅវិញក្លាយជាបុរសមានទ្រព្យសម្បត្តិលើសពីក្តីស្រមៃមុនៗ១០ដង…ប៉ុន្តែតើអាចត្រលប់ទៅរស់នៅក្នុងអរិយធម៌មនុស្សវិញដែរទេ? នោះជាការកំណត់នៃព្រហ្មលិខិត។
ព្រះអល់ឡោះអើយ តើទ្រព្យសម្បត្តិនៅជ្រលងភ្នំមរណៈនេះបានអ្នកណាប្រើ?
ដោយស្រេកឃ្លាននិងរងា ខ្ញុំក៏រកឃើញរូងមួយងងឹតក្បែរៗ សសៀររត់ទៅជ្រក ហើយឱបដៃលក់មួយភាំងរហូតអ្វីមួយដែលរអិលៗបានហូរចេញមកពីទិសដៅខ្ពស់ជាងដាស់ខ្ញុំមកវិញ។
ពេលដឹងខ្លួនបានបន្តិចក្រោយមក ខ្ញុំពិនិត្យហើយភ្ញាក់ក្រញាងថា នៅក្នុងល្អាងនេះដែរ មានសត្វពស់យក្សមួយក្បាលកំពុងពង មិនដឹងវាមកដល់ពីពេលណា និងបានឃើញខ្ញុំទេ? វានៅសំងំពេនការពារកូនវានិងពងវាជុំវិញនោះ។
សាច់របស់ខ្ញុំញ័រ សក់របស់ខ្ញុំបះជ្រោង។ ពស់យក្សបាំងនៅច្រកចេញ តើខ្ញុំធ្វើបែបណា?
សឹងមិនអាចដកដង្ហើម ខ្ញុំងើបមុខឡើងមើលទៅកាន់ឋានសួគ៌និងបួងសួងព្រះអល់ឡោះ សម្រេចចិត្ត លះបង់ខ្លួនឯង ទុកសម្រេចតាមជោគវាសនា ហើយបានចំណាយពេលពេញមួយយប់នោះ ដោយមិនបានដេក សំងំក្នុងជម្រកងងឹតមួយជាមួយសត្វអាសិរ្ពិសនិងធំមហាធំ។
ពេលថ្ងៃព្រលឹមមកដល់ វាមិនបានឃើញខ្ញុំដដែល តែបានវារចេញទៅលាក់ខ្លួន ទុកនូវពងមួយសំបុកធំ។ ខ្ញុំរង់ចាំដោយអំណរ ដល់វាចេញស្ងាត់យូរក្រែលទើបហ៊ានចាកចេញដោយលូននិងដើរដូចមនុស្សស្រវឹង ញ័រខ្លួន ដោយភ័យខ្លាចនិងការស្រេកឃ្លាន ស្រៀវជើងស្រៀវដៃ។
នៅក្រៅមិនឃើញមានសត្វកំណាចណាទាំងអស់ ខ្ញុំរូតរះចុះពីជ្រលងភ្នំសំដៅទំនាបវាល។ សង្ឃឹមបើមានសំបុកឃ្មុំធ្លាក់ឬផ្លែឈើទុំស្អុយណាខ្លះក៏គ្រាន់បើ។
ពេលខ្ញុំដើរមិនបានប៉ុន្មានរបស់ដែលជ្រុះធ្លាក់មកពីលើមេឃ បែរជាសាច់សត្វដ៏ធំខ្ពៀក! ខ្ញុំឈរភាំង។ ឱ! សាច់សត្វមកពីណាទៅហ្ន៎?
តើមានបក្សីយក្សណាមួយ រកសាច់បានហើយហើរមកធ្លាក់?
ពេលនេះ តើបានភ្លើងពីណាមកចម្អិន?
កំពុងផ្អៀងសាច់មើល ខ្ញុំឃើញគ្រាប់ពេជ្ររាប់រយជាប់ជុងដោតស្អិតក្នុងសាច់នោះភ្លឺផ្លេកៗ។ សាច់មួយដុំថ្មី និងដុំទីបីធ្លាក់ចុះមកដែរនូវកន្លែងផ្សេង ខាងមុខនិងពីក្រោយខ្ញុំ។
ស្នូរទទះស្លាបបានបំបែកអារម្មណ៍ភ្លឹករបស់ខ្ញុំ។
ខ្ញុំថយមកពួនក្រោយគុម្ពោតព្រៃ។ បក្សីធំៗពីរបីក្បាលបានហោះមកជាបន្តបន្ទាប់ រួចសណ្តោងយកដុំសាច់ដែលមានជាប់ពេជ្រនោះឡើងទៅ។
យល់ហើយ!
ខាងលើប្រាកដជាមានមនុស្ស! ពួកគេបោះដុំសាច់ធំៗចុះមកជ្រលងនេះ ក៏ដើម្បីតែមកយកពេជ្រសោះ។ បន្ទាប់មក ខ្ញុំនឹកឃើញរឿងរ៉ាវសរសេរទុកក្នុងតម្រារបស់អ្នកធ្វើដំណើរម្នាក់អំពីជួរភ្នំដ៏គ្រោះថ្នាក់តែពោរពេញទៅដោយត្បូងមានតម្លៃនិងទ្រព្យសម្បត្តិសួយសាអាករសល់ពីចោរបុរាណ។
រឿងនោះបានកើតឡើងដោយតំណាលថា ពួកឈ្មួញដែលមកប្រទះនឹងព្រលងមហាកំណប់ បានរកមធ្យោបាយទម្លាក់សាច់ទៅក្នុងជ្រលងភ្នំដោយសង្ឃឹមថា សម្បត្តិត្បូងឬពេជ្រនឹងដោតជាប់។ បន្ទាប់មក ពួកគេនឹងរង់ចាំដល់សត្វឥន្ទ្រី ហើរចុះមករើសសាច់នាំយកទៅកាន់សំបុករបស់វា ពេលនោះ ពួកឈ្មួញនាំគ្នាឡើងទៅលើសំបុក ហើយបន្លាចបក្សីដោយការស្រែកគប់ដំបងនិងថ្ម។ ដោយវិធីនេះ ពួកគេអាចរង់ចាំស្ទាក់បង្អើលយកត្បូងពេជ្របាន។
ពេលខ្ញុំញញឹមដូចមនុស្សវិកលចរិតព្រោះដឹងថា ច្បាស់ណាស់ខ្ញុំត្រូវធ្វើអ្វីដើម្បីរួចជីវិត។ ដំបូងបង្អស់ ខ្ញុំបានបំពេញហោប៉ៅទាំងឡាយរបស់ខ្ញុំដោយបណ្តាគ្រាប់ត្បូងពេជ្រធំៗ។ សូម្បីតែក្នុងចង្កេះខោក៏ដាក់ដែរ។ បន្ទាប់មកពេលសាច់ធ្លាក់ដល់ដីខ្ញុំរើសមកចងភ្ជាប់ពីលើទ្រូងដោយអាវរហែករបស់ខ្ញុំ។
ខ្ញុំដេករង់ចាំឥន្ទ្រីយក្ស។ មិនយូរទេ វាពិតជាបានមកដល់ហើយទាញខ្ញុំជាប់ នៅក្នុងក្រញាំរបស់វា។ ពេលវាយកសាច់ទៅដាក់ចោលមកលើសំបុកខ្ញុំបានឡើងទៅជាមួយ ដូច្នេះហើយ នេះជាវិធីដែលខ្ញុំត្រូវបានគេលើកយកចេញពីបាតជ្រលងភ្នំ។
នៅពេលមកសំបុកឥន្ទ្រីមានពេលតិចតួចក្នុងការហែកអាហារ ព្រោះភ្លាមៗនោះវាត្រូវបានរំខានដោយការស្រែកខ្លាំងៗពីក្រុមម្ចាស់សាច់ព្រៃ ជាមួយប្រដាប់ដំបង ព្រនង់គ្រប់ដៃនិងដុំថ្មផង។
ការយាយីនេះបណ្តាលឱ្យបក្សីស្លាបហើយហោះចេញចោលឋាន។ ក្រុមបុរសព្រៃ បានស្ទុះចូលមកជិត ហើយភ្ញាក់ផ្អើលជាខ្លាំងពេលឃើញខ្ញុំក្រោកឡើងពីក្រោមពំនូកសាច់។
ចិត្តខ្ញុំពោរពេញទៅដោយភាពរីករាយ ប៉ុន្តែដំបូងឡើយ ខាងពួកគេវិញពិតជាមានការខកចិត្ត និងខឹង។
«តើនេះជាល្បិចអ្វី?» ម្នាក់បានស្រែកឡើង។
ម្នាក់ទៀតបន្ទោរ៖
«យើងបានប្រថុយជីវិតដើម្បីរកទ្រព្យសម្បត្តិពីជ្រលងភ្នំ មិនមែនយកមនុស្សស្មូមមកធ្វើអ្វីទេ!»
«កុំព្រួយ»
ខ្ញុំស្រែកតបដោយសុភមង្គលហើយបើកហោប៉ៅបង្ហាញគ្រាប់ពេជ្រនិងទ្រព្យផ្សេងទៀត ចែកឱ្យពួកគេ។ ដោយសារយើងបានចំណែកស្មើគ្នា សន្តិភាពក៏កើតឡើង។
ពួកគេយល់ព្រមចែកទឹក អាហារនិងជួយខ្ញុំចុះទៅរកភូមិករ។
នៅពេលយើងកំពុងធ្វើដំណើរចេញទៅ ខ្ញុំបានបរិយាយប្រាប់ពួកអ្នកស្រុកទំាំងនោះអំពីដំណើរផ្សងព្រេងកម្សត់ខ្ចាត់ព្រាត់នេះ ហើយពួកគេពោរពេញទៅដោយការអាណិតនិងសរសើរនូវសំណាងដ៏អស្ចារ្យក្នុងជីវិតខ្ញុំ។
ក្រុមយើងត្រូវចំណាយពេលពីរថ្ងៃឯណោះទើបអាចដើរចុះពីជួរភ្នំ។
មិនយូរប៉ុន្មាន ទីបំផុតពួកយើងបានមកដល់ដីភូមិក្រោមស្រមោលដោយដើមឈើធំៗ។ តាមផ្លូវព្រានបានប្រាប់ថា នៅជើងភ្នំ គ្រោះថ្នាក់តែមួយគត់គឺសត្វរមាសយក្ស។ ពួកវាធំលើសរមាសធម្មតាដែលមានចរិតកំណាចខ្លាំងក្លា អាចជាន់ឈ្លីមនុស្សដល់ស្លាប់ប្រសិនបើវាឃើញយើង។
ខ្ញុំបានរកនឹកមធ្យោបាយសំខាន់មួយ គឺនៅពីក្រោមខ្យល់មិនឱ្យពួកវាធុំក្លិនយើងទេ ដូច្នេះទាំងភ័យខ្លាច យើងបានទៅដល់កប៉ាល់ព្រានដោយសុវត្ថិភាព ហើយបន្តធ្វើដំណើរទៅកាន់ទីក្រុងកំពង់ផែ ជាកន្លែងដែលយើងបែកគ្នាទៅរកគោលដៅបន្តរៀងៗ។
ពេលនោះ ខ្ញុំមានទ្រព្យសម្បត្តិច្រើនជាងមុនដល់ទៅពីរដង ហើយក្នុងពេលឈានជើងមកដល់ផ្ទះ ខ្ញុំបានស្បថថា ខ្ញុំនឹងមិនដើរកប៉ាល់ទៀតឡើយ។
ឱ! អ្នកលីសែងកម្សត់អើយ បើសិនជាខ្ញុំនេះ ពិតជាបានគោរពធ្វើតាមពាក្យសន្យា នោះទំនងជាខ្ញុំមិនអាចជួបរឿងយ៉ាងរន្ធត់បន្តជាខ្សែទៀតនោះឡើយ។
អ្នកលីសែង មានការភ្ញាក់ផ្អើលចំពោះអ្វីដែលគាត់បានឮ។ ស៊ីនបាដបានឱ្យមាស១០០កាក់ដល់គាត់ ហើយអញ្ជើញគាត់ថា បើចង់ដឹង ត្រលប់មកវិញនៅល្ងាចបន្ទាប់ដើម្បីស្តាប់រឿងពិតនៃដំណើរផ្សងព្រេងរបស់ខ្ញុំទៀត។
ដំណើររឿងលើកទីបីរបស់ខ្ញុំដែលអាក្រក់ជាងដំណើរមុនៗទៅទៀត
ច្រើនឆ្នាំក្រោយមក ខ្ញុំធុញទ្រាន់នឹងភាពប្រណីតនៅមួយកន្លែង។ ខ្ញុំមិនអាចសម្រាកបានស្រួលនៅលើគ្រែទន់ល្មៃនិងក្រោមភួយឬខ្នើយសូត្របានយូរ ទោះជាពោះពេញទៅដោយអាហារឆ្ងាញ់នៅតែខ្ញុំចង់ដើរកប៉ាល់។
ប្រហែលជាខ្ញុំញៀននឹងជីវិតផ្សងព្រេង ឬធុញឆាប់រហ័សក្នុងការរស់នៅសុខស្រួល ឬអាចនិយាយបានថា ខ្ញុំលោភលន់ចង់បានមាសប្រាក់បន្ថែមទៀត អ្វីក៏ដោយ អាចថាជីវិតនេះមិនមានន័យបើមិនបានធ្វើអ្វីប្រថុយប្រថាន។
ដូច្នេះហើយ ខ្ញុំបានទៅដើរសមុទ្រម្តងទៀត។ ដូចពីមុនដែរ ខ្ញុំមិនបានទៅឯកោទេ គឺចូលរួមជាមួយកប៉ាល់របស់ឈ្មួញជាច្រើនគ្នា ហើយយើងបានធ្វើដំណើរពីកំពង់ផែមួយទៅកាន់កំពង់ផែពាណិជ្ជកម្មមួយផ្សេងជួញដូរចុះឡើងបណ្តាសម្លៀកបំពាក់ ព្រំ ព្រែ ទឹកក្រអូប គ្រឿងទេស ផ្លែឈើ ដំណាប់ស្ងួតនិងមាសប្រាក់។
សម្រាប់រយៈពេលពីរសប្តាហ៍ដំបូង យើងរីករាយនឹងអាកាសធាតុល្អ ប៉ុន្តែនៅថ្ងៃទីដប់ប្រាំនៃការធ្វើដំណើររបស់យើង ខ្យល់ព្យុះបានឱ្យសញ្ញានៅជើងមេឃ។
កាពីទែនបានប្រមូលអ្នកដំណើរលើនាវា មកប្រជុំប្រាប់ថា៖
«ខ្យល់កំពុងជួយធ្វើឱ្យយើងទៅដល់ច្រាំងឆាប់ៗ មុនព្យុះមកដល់ តែវាជាកន្លែងយើងមិនធ្លាប់ស្គាល់ពីមុនមកសោះ ចូរប្រុងប្រៀបស្មារតីនិងសម្ភារៈចូលព្រៃហើយបែរបន់ផ្ញើជោគវាសនាក្នុងដៃអល់ឡោះទៅចុះ»។
ហើយគាត់និយាយត្រូវ។
ក្នុងរយៈពេលមិនយូរប៉ុន្មានបន្ទាប់ពីពួកយើងបានចូលទៅជិតច្រាំង ការពិនិត្យបានធ្វើឱ្យយើងរកឃើញថា ទីនេះជាកុលសម្ព័ន្ធនៃសត្វស្វាដែលចម្លែក។
ភាគច្រើនស្វារស់នៅលើមែកឈើខ្ពស់ៗ ផ្ទុយទៅវិញពួកគេកាន់លំពែង ហើយមានសភាពកំណាចដូចមនុស្សដែលធ្វើអំពើអាក្រក់ប្លន់គ្នាលើគោក និងតាមជាយសមុទ្រ។
ពួកស្វាឃើញយើងកាលណា ក៏ព្រួតគ្នាចោលអាវុធមកប្រល័យទាំងកំរោល ធ្វើឱ្យយើងស្លាប់បីនាក់ភ្លាមៗ អ្នកនៅសល់ក៏បង្ខំចិត្តនាំគ្នាបកឡើងកប៉ាល់ចេញទៅរកសមុទ្រវិញទាំងមេឃខ្មៅស្រអាប់ កាំរស្មីពិមេឃព្រាកៗ។
កប៉ាល់សត្វស្វាមួយគ្រឿង បានបើកប្រដេញតាមយើងយ៉ាងលឿនលយទៀត? ពួកវាមានសណ្ឋានដូចជា ចោរសមុទ្រដែលមានរោមវែងៗនិងដៃជើងរហ័ស កំណាចឃោរឃៅរ។
ពួកវាមកដល់កាលណាហក់ឡើងមកលុកលុយ ដោយខ្លះកាត់ខ្សែពួររបស់យើង ដើម្បីកុំឱ្យយើងទៅណាបានហើយ យើងមិនហ៊ានវាយតបទេ ព្រោះគ្មានអាវុធគ្រប់ ហើយខាងវាគ្នាច្រើនពេក។ ផ្ទុយទៅវិញ យើងបានលោតចុះទៅក្នុងសមុទ្រ ហើយហែលប្រាស់រាងៗ។
មានគ្នាយើងដែលរួចផុតពីការវាយប្រហារប្រមាណ១០នាក់ប៉ុណ្ណោះបានប្រមូលផ្តុំគ្នានៅលើឆ្នេរហើយជំនុំ។ ក្រោយមកយើងសម្រេចថា វាគ្រោះថ្នាក់ខ្លាំងពេកក្នុងការស្នាក់នៅទីនោះ ទើបប្រថុយផ្លាស់ទី រាវរកផ្លូវរុករកជម្រកនៅលើកំពូលភ្នំមួយ។ យើងគិតថា អ្វីក្តីដែលកំពុងរង់ចាំយើងនៅលើភ្នំ គឺវាឃោរឃៅ តិចជាងការត្រូវបានហែកស្លាប់ដោយហ្វូងសត្វស្វាកំណាច។ អ្នកផ្សេងទៀតយល់ស្រប ហើយតាមគ្នាសសៀរតោងឡើងតាមផ្លូវដ៏ចោតហត់នឿយនិងបាក់ស្បាត។
ប្រហែលជាមួយម៉ោងក្រោយ យើងបានមកដល់ផ្នែកខាងលើចង្កេះភ្នំដែលរាបស្មើធំទូលាយ។
យើងឃើញ ទីធ្លាមួយដូចជាធ្លាប់មានអ្នកភូមិរស់នៅ។ ទោះណាជាយើង មិនទាន់អាចមើលឃើញស្រមោលសត្វឬមនុស្សដែលមានជីវិត ក៏មានសញ្ញាថាធុំក្លិនសាច់អាំងអណ្តែតមកតាមខ្យល់។ យើងរត់រកតាមក្លិនពិតជា ពើបយ៉ាងអំណរទៅនឹងសំណល់សាច់ចៀមនៅជុំវិញភ្នក់ភ្លើង។
យើងសម្រេចចិត្តហូបចម្អែតរួចប្រះដេកសម្រាកអវយវៈដែលសែននឿយហត់ រន្ធត់និងបាក់កម្លាំង។
ការរញ្ជួយដីញ័រៗដាស់ខ្ញុំព្រើត។
ញីភ្នែកតិចៗ ខ្ញុំប្រទះឃើញជញ្ជាំងថ្មដ៏រឹងមាំនៃចង្កេះភ្នំ ហាក់ដូចជាកំពុងរំជួយញាប់ញ័រ។ ខ្ញុំស្ទុះក្រោក ហាមិនរួច លូកអង្រួនអ្នកណាមិនបាន ព្រោះរន្ធត់និងប្រថុចញ៉ុចហួសហេតុ។
មិនយូរប៉ុន្មានដូចគំនិតខ្ញុំគិត បិសាចក្នុងរូបរាងជាមនុស្ស ដែលមានកម្ពស់ដូចជាដើមឈើ មានភ្នែកសងខាងក្រហមដូចជាធ្យូងភ្លើង ធ្មេញរបស់វាដូចជាភ្លុកជ្រូក ក្រចកវែងធំសែនធំក្នងទម្រង់ដូចជាក្រញ៉ាំជើងតោ ហើយមាត់ប៉ុនអណ្ដូងទឹក។
ខ្ញុំធាក់ថយទន់ជើង ពេលឃើញអ្នកខ្លះក្រោករត់ ប៉ុន្តែត្រូវបិសាចឱនចុះហើយចាប់យកឡើង។ ម្នាក់នោះស្រែកទើបយើងដឹងថា គាត់ជា នាវិក។ បន្ទាប់នោះ យក្សបានឆីគាត់ ហើយខ្ញុំក៏សន្លប់បាត់ស្មារតី។
ក្នុងសុបិន ខ្ញុំសួរខ្លួនឯងថា តើវាសនាមួយណាដែលគួរខ្លាចជាងគេ?
ត្រូវយក្សស៊ី ឬហែកដោយសត្វស្វា?
នៅទីបញ្ចប់ទស្សនៈរបស់ខ្ញុំបានយកឈ្នះ ខ្ញុំគិតថាមិនអាចគ្រាន់តែអង្គុយរង់ចាំស្លាប់ទេ។ ខ្ញុំដឹងខ្លួន ហើយរៀបចំផែនការខណៈយក្សានៅតែដេកលក់ក្រោយឆីមនុស្សពីរនាក់។
យើងខ្សឹបគ្នាបំបែកជាពីរក្រុមរួចបង្កើតអាវុធរបស់យើងពីក្នុងព្រៃ បន្ទាប់មកក្រោយបានគិតគ្នាល្អិតល្អន់ យើងដើរទៅជិតយក្សដែលកំពុងដេក ហើយចាក់លំពែងចូលភ្នែកវាទាំងសងខាង។
ការឈឺចាប់ ដាស់វាឱ្យភ្ញាក់ឡើងជាមួយសំឡេងគ្រហឹម ស្រែកដោយឈឺចាប់ ហើយស្រវេស្រវាច្បាមរកប្រហែលសង្ឃឹមថានឹងរកពួកយើងឃើញទាំងភ្នែកខ្វាក់ងងឹត។ ចុងក្រោយអម្បូរកំណាចក៏ជំពប់ដួលត្រលប់ត្រឡិនពីមុខរូងភ្នំ បន្ទាប់មករមៀលធ្លាក់យ៉ាងអណោចអធម៌ទៅក្នុងស្រះផុតសំឡេងយ៉ាងគ្រលួច។
យើងមិនខ្ជះខ្ជាយពេលវេលាក្នុងការរត់ចុះចេញពីចង្កេះភ្នំឱ្យលឿនតាមដែលអាចធ្វើបានក្នុងទិសដៅចុះត្រលប់ទៅឆ្នេរ។ សូមអរគុណដល់ព្រះហឫទ័យរបស់ទ្រង់អល់ឡោះ ដែលបានដឹកនាំអ្វីៗទាំងអស់នេះរួចពួក យើងនៅសល់៨នាក់ បានមកដល់ទូករបស់យើងដោយសុវត្ថិភាព ហើយមិនឃើញទ័ពស្វាទេ ។ មិនបង្អង់ពួកយើងបានចេញដំណើរ។ ពីលើចង្កេះភ្នំ យើងឃើញយក្សបីទៀតបង្ហាញខ្លួនឈរ ហើយបោះនៅថ្មធំៗសំដៅមក។
ពួកវាប្រហែលទើបនឹងមកដល់ក្រោយពីបានឮសម្រែកឈឺចាប់របស់អាមួយមុនគេនោះ។ ពួកយក្សបន្តគប់និងបោះថ្មភ្នំធំៗ ចុះទៅក្នុងសមុទ្រតែមិនអាចត្រូវកប៉ាល់របស់យើង គ្រាន់តែបង្កជារលកដ៏ខ្លាំង ប៉ុន្តែយើងបានចេញលឿនលយនិងសុវត្ថិភាព។
នៅពាក់កណ្តាលព្រឹកនាថ្ងៃបន្ទាប់ ពួកយើងបានឃើញច្រាំងថ្មីមួយ។ ទីនោះក៏មិនមានសញ្ញាជាផែឬភូមិអ្វីដែរ។ តែដោយអត់ឃ្លានពេក ក៏សម្រេចថាប្រថុយឡើងរកមើលទឹកសាបនិងផ្លែឈើ ។ ដោយស្មារតីប្រុងប្រយត្ន័ខ្ពស់ ពួកយើងពិតជាឃើញស្រះហើយស្រូតនាំគ្នាផឹកទឹក និងគប់រើសផ្លែក្បែរៗនោះ មិនហ៊ាននៅអែអង់ទេ។
កំពុងជញ្ជូនទឹកសាបនិងផល្លាឡើងទូក សត្វពស់ដ៏ធំមួយបានទម្លាក់ខ្លួន ពីលើដើមឈើហើយព័ទ្ធជុំវិញគ្នាយើងម្នាក់។ យើងនាំគ្នា វាយប្រហារសត្វចម្លែកដោយកាំបិតនិងថ្ម ប៉ុន្តែគួរឱ្យស្តាយ សំឡេងប្រទូស្តរាយមិនបានជួយអ្វីក្រៅពីបង្អើលប្រកូកប្រកាសឱ្យឮផ្អើលដល់សត្វពស់យក្សជាច្រើនទៀត លូននិងវាររសាត់ចេញពីគុម្ពោតមកតម្រង់ពួកយើង។
គ្នាខ្ញុំប្រាសអាយូសក្នុងទិសដៅខុសគ្នា ហើយខ្ញុំវិញរត់យ៉ាងតក់ស្លុតមិនដឹងទីណាជាទីណារហូតភាពងងឹតបានធ្លាក់ចុះ មកគ្របដណ្តប់ទាំងស្រុងហើយខ្ញុំមិនអាចរកផ្លូវត្រលប់ទៅឆ្នេរបានទេ។
ដោយសារគិតថា ការសម្រាកនៅទីចំហខ្លាចត្រូវពស់ចឹក ខ្ញុំបានសម្រេចចិត្តសង់ទីជម្រក ហើយចាប់ផ្ដើមកាប់មែកឈើ។ ខ្ញុំបានប្រើឈើដើម្បីសង់ទ្រុងមួយនៅជុំវិញខ្លួនខ្ញុំ យ៉ាងល្អិតមិនឱ្យសត្វលូនចូលមកបាន ហើយនៅក្នុងនេះ ខ្ញុំបានល្វើយសន្លប់ពេញមួយយប់។ លុះព្រឹកឡើង ខ្ញុំលើកទ្រុងឡើងដើរទៅជាមួយ។ តាមផ្លូវខ្ញុំមានសុវត្ថិភាពពីសត្វពស់នៅក្នុងឈុតពាសជាទ្រុងឈើរបស់ខ្ញុំនេះហើយរហូតដល់ឆ្នេរ ដែលអស់សង្ឃឹម ព្រោះសំពៅបានចេញចោលខ្ញុំតាំងពីយប់ទៅហើយ។
ខ្ញុំនៅសំងំយំក្នុងទ្រុង ហើយបានបោះចោលទ្រុងវិញក្រោយពេលរកឃើញសេចក្ដីរស់រានមួយថ្មី គឺវត្តមានសំពៅមួយទៀតអណ្តែតមកលឹមៗ។
ខ្ញុំលោតហ៊ោម្នាក់ឯងដោយភាពរីករាយ គ្រវីដៃ ហើយស្រែករហូតដល់ទីបំផុតពួកគេបានប្រទះឃើញខ្ញុំមែន។ នោះជាទូកមួយតូចជាងរបស់ពួកខ្ញុំ។ នាវិកពីរនាក់បានបង្កើនល្បឿនមកច្រាំង ហើយបានជួយសង្គ្រោះខ្ញុំឡើង។
សូមអរគុណដល់ព្រះអល់ឡោះ។ នៅលើដំណើរចាកចេញពីកោះពស់ ខ្ញុំបានតំណាលប្រាប់រឿងរ៉ាវខ្មៅងងឹតរបស់ខ្ញុំនិងដំណើរផ្សងព្រេងដ៏អស្ចារ្យទាំងអស់ទៅកាន់ប្រធានក្រុមនាវិក។ នៅចុងបញ្ចប់នៃរឿងនិទាន គាត់បានមើលមកខ្ញុំ ហើយនិយាយថា៖
«ពិតប្រាកដណាស់ រឿងរបស់អ្នកបង្ហាញអំពីវិធីកំណត់វាសនាអស្ចារ្យរបស់ព្រះអល់ឡោះ។ ដំបូងខ្ញុំមិនស្គាល់អ្នកទេ។ សភាពដ៏សោកសៅដៃលអ្នកកំពុងស្ថិតនៅក្នុងទុក្ខ ឃើញថាខ្ញុំត្រូវបានអល់ឡោះប្រគល់នាទីជាអ្នកសង្គ្រោះដល់អ្នក»
ចាប់ពីថ្ងៃនោះមកការធ្វើដំណើររបស់ខ្ញុំនិងជំនួញរបស់ខ្ញុំបានដំណើរការសាជាថ្មីជាមួយអលង្ការខ្លះៗដែលខ្ញុំមានជាប់ខ្លួនហើយគ្រប់យ៉ាងកាក់កបយ៉ាងល្អ។ យើងទិញលក់នៅកន្លែងណាដែលយើងទៅដល់ ខ្ញុំបានតស៊ូបង្កើតទ្រព្យឡើងវិញ លក់ដូរសូម្បីស្លឹកខ្ទឹមនិងខ្ញី មិនថាអ្វីសូម្បីគ្រឿងទេសគ្រប់ប្រភេទ។ ហើយបន្ទាប់មកយើងបានធ្វើដំណើរទៅកាន់ស្រុកស៊ីនឌឹម ជាកន្លែងដែលខ្ញុំបានរកឃើញឈ្មួញសូត្រ ហើយបានចូលហ៊ុនរកស៊ីពេញមួយឆ្នាំជាមួយពួកគេដោយទទួលបានប្រាក់ចំណេញច្រើនស្តុកស្តម្ភ។
បន្ទាប់មកការរង់ចាំរបស់យើងបានសម្រេចពិត។ ពេលវេលាចេញសំពៅល្អសមុទ្រស្ងប់ខ្ញុំបានវិលមកដល់ក្រុងបាស៉ូរ៉ា ដោយសុវត្ថិភាពហើយរៀនបានយ៉ាងលើសលុបអំពីគុណនិងធម៌។
ខ្ញុំបានសម្រេចចិត្តបរិច្ចាគជូនស្ត្រីមេម៉ាយនិងកុមារកំព្រានូវប្រាក់សុទ្ធ ធញ្ញជាតិនិងខោអាវ។ វិលមកផ្ទះ ខ្ញុំបានជប់លៀងសប្បាយជាមួយមិត្តភក្ដិ ហើយភ្លេចចោលសន្សឹមៗរាល់ការលំបាកដែលខ្ញុំបានរងទុក្ខ។
ថ្ងៃស្អែក អ្នកនឹងបានស្តាប់រឿងកណ្តាលនៃការធ្វើដំណើរទាំងប្រាំពីរលើករបស់ខ្ញុំ។ កុំភ្លេចមកឱ្យសោះអ្នកលីសែងព្រោះនោះគឺជារឿងដ៏ស៊ីជម្រៅបំផុតមួយ។
នៅយប់បន្ទាប់មកពិតជាមានពិធីជប់លៀងនិងភាពសប្បាយរីករាយម្ដងទៀតនៅក្នុងផ្ទះរបស់ឈ្មួញស៊ីនបាដ។ គាត់និយាយទៅកាន់ឈ្មោះអ្នកលីសែងថា៖
«ឃើញ? នៅជុំវិញផ្ទះខ្ញុំភ្លឺស្វាងពោរពេញទៅដោយភាពសប្បាយរីករាយនិងសំណើចតែវាមិនដូចគ្នាទេ នៅពេលដែលអ្នកបានឮរឿងរ៉ាវនៃការធ្វើដំណើរទីបួនរបស់ខ្ញុំ។ គ្រប់គ្នានឹងដឹងថា ដើម្បីឈានដល់ស្ថានភាពដ៏រីករាយពេលនេះ ខ្ញុំបានវារ លូននិងឆ្លងកាត់កន្លែងដ៏ក្រៀមក្រំដែលមានភាគរយនៃការស្លាប់ច្រើនជាងនៅរស់។
ដំណើរលើកទីបួនឆ្លងកាត់ច្រកសមុទ្រ Hormuz
ដូចពីមុនដែរ យើងធ្វើដំណើរពីកន្លែងមួយទៅកន្លែងមួយ ធ្វើអាជីវកម្មទិញលក់ ហើយចំណេញ។ ធ្វើបែបនេះបានប្រមាណជាបួនខែ យើងវិលមកលើសមុទ្រវិញហើយបកក្រោយ។ ដំបូងសមុទ្រស្វាគមន៍យើងយ៉ាងសុភាព តែបានត្រឹម៦ថ្ងៃ ខ្យល់បានឱ្យតម្រុយបក់ប្តូរទិស។ ប្រធានក្រុមនាវិកបានបោះយុថ្កា ដាក់កប៉ាល់ឈប់ស្ងៀមដោយពេលនោះ យើងទាំងអស់គ្នាក៏បានលុតជង្គង់អធិស្ឋាន ហើយបន្ទាបខ្លួននៅចំពោះព្រះដ៏ខ្ពង់ខ្ពស់ ប៉ុន្តែយប់បន្តិច យើងត្រូវបានខ្យល់ព្យុះដ៏ខ្លាំងមួយរហែកមេឃ បានហែកកម្ទេចកប៉ាល់ឲ្យបាក់បែកខ្ទេច ខ្សែយុថ្កាបានខ្ទាស់ប៉ើង ហើយគ្រប់យ៉ាងត្រូវបានបោះចូលក្នុងសមុទ្រ ទំនិញនិងអ្វីៗគ្រប់យ៉ាង។
រលកបានបោកបក់ក្រុមយើងខ្លះមកទើរនៅលើមាត់ច្រាំង។
ខ្ញុំក្រោកឡើងមក មានអារម្មណ៍ស្ទើរតែស្លាប់ដោយភាពនឿយហត់និងត្រជាក់ ស្រេកឃ្លាន ខះកគ្មានជាតិទឹក និងការភ័យខ្លាច។
ទោះយ៉ាងណាពេលវេលារំលងទៅ ពួកយើងមិនអាចសំងំរង់ចាំដាច់ពោះមានតែបបួលគ្នាបង្កើនសេចក្តីក្លាហានដើរជុំវិញកោះ។
ទីនេះមានតម្រុយមានមនុស្សនៅនិងធ្លាប់ឆ្លងកាត់តាមរយៈស្នាមដានលើស្មៅ។ យើងអរណាស់ ដើរតាមដាននោះ រហូតដល់មាត់ច្រកចូលវិមានដ៏ល្អប្រណីតមួយ។
គ្នាយើងសម្រេចិត្តគោះទ្វាររកជំនួយ។
បុរសមួយចំនួនបានចេញមកមែន ពួកគេមិននិយាយភាសារបស់យើងទេ ប៉ុន្តែពួកគេបានឱនចុះមកគំនាប់ ហើយស្វាគមន៍យើងក្នុងរបៀបដែលមានអរិយធម៌។
ភ្លាមៗនោះ យើងជឿថា ក្រុមយើងមានសំណាងខ្ពស់ណាស់យ៉ាងហោចណាស់នឹងបានចម្អែតពោះហើយ។ ក្រុមយើងត្រូវបានពួកគេបាននាំផ្លូវ ដើរកាត់តាមសួនច្បារនិងទីធ្លា ហើយចូលឆ្ពោះទៅក្នុងសាលធំមួយ ទីដែលស្ដេចរបស់ពួកគេបង្ហាញព្រះកាយនៅលើបល្ល័ង្ក។
ពេលយើងខ្ញុំឱនមកគោរពគួរសម ទ្រង់បានទទួលយើងដោយរាក់ទាក់បំផុត ហើយបានផ្តល់សញ្ញាឱ្យយើងអង្គុយនៅតុវែង ដែលអ្នកបម្រើបានយកចានដែលពេញទៅដោយផ្លែឈើនិងនំបុ័ងដុតដ៏ឈ្ងុយឈ្ងប់មកដាក់ទទួល។
បន្ទាប់មកមានបង្អែម ដំណាប់និងទឹកឃ្មុំ។ ក្រុមយើងចាប់ផ្ដើមញ៉ាំអាហារយ៉ាងភ្លើតភ្លើនភ្លេចសុជីវធម៌។ អាកប្បកិរិយាដ៏ឈ្លើយនេះគឺមិនធម្មតាបំផុតសម្រាប់ចិត្តសម្ងាត់របស់ខ្ញុំ មានអារម្មណ៍ម្យ៉ាងថា ដូចជាពួកគេត្រូវបានចូលសណ្ឋិតដោយវិញ្ញាណអាក្រក់ៗ។ ក្រឡេកទៅម្ចាស់ផ្ទះ គេហាក់ដូចជាមិនខ្វល់អ្វីទេ។ គេយកទឹកដូងលាយសុរាមកឱ្យផឹកក៏គ្នាយើងផឹក។
ហើយពេលគ្នាយើងទាំងនោះស្រវឹង ក៏កាន់តែបង្ហាញសភាពច្រលោមខាងណាស់ទៅទៀត។
ខ្ញុំមានគំនិតសង្ស័យ។
ពិតណាស់យើងមិនដែលស្គាល់ទីនេះទេ តើយើងមានសិទ្ធិអ្វីឱ្យគេបម្រើ ហើយហូបចុករបៀបនេះ? ខ្ញុំសម្គាល់និងមិនហ៊ានលើកមកហូបនូវអ្វីមួយដែលចម្លែកក្រៅតែពីផ្លែឈើធម្មជាតិឡើយ។
លុះពេលដែលអ្នកទាំងអស់គ្នាបរិភោគឆ្អែតស្កប់ស្កល់គ្រប់គ្រាន់ថែមទាំងស្រវឹងទន់ខ្លួនលែងមានកម្លាំងនឹងបានមាត់កោកកាកតទៅទៀតហើយ ទើបឈប់មានការលើកអាហារមកបន្ថែម។
ពេលនេះនោះខ្ញុំធ្វើពុតជាអង្គុយងោកងងុយដេក ក៏លបមើលឃើញពួកគេទទួលបានសញ្ញាយកខ្នើយនិងភួយមករៀបចំឱ្យភ្ញៀវសម្រាក។
រង់ចាំយូរណាស់ មិនឃើញអ្វីក្រៅពីភាពស្ងប់ស្ងាត់ ខ្ញុំក៏លក់មួយភាំងរហូតដល់ពេលព្រឹកឡើង។ ពួកយើងត្រូវបានគេរាក់ទាក់ទទួលឱ្យហូបចុកយ៉ាងប្រណីតទៀត។
បន្ទាប់មកគឺ ទាសករនាំយើងដើរលេងលម្ហែក្នុងចំណោមចម្ការហូបផ្លែ ហែលទឹក ឡើងភ្នំ ហើយហូបចុកបរិបូរណ៍ រួចមកវិញសម្រាកដេកលេងផឹកស្រាស្រែកច្រៀងតាមចិត្ត។
ម្នាក់ៗនៅតែប៉ុន្មានថ្ងៃសោះ ក៏ភ្លើតភ្លើនលែងមានបំណងវិលទៅផ្ទះ ចេះតែពន្យារពេល ឱ្យខ្លួនឯងសោយសុខលែងធ្វើការងារ រាងកាយលូតលាស់ធាត់ទ្រលុក។
លើកលែងតែខ្ញុំដែលមិនថមថយការចាប់អារម្មណ៍នឹងអាកប្បកិរិយារបស់ស្តេចនគរនេះ ចេះតែនឹកឆ្ងល់ថា ម្តេចបានជាគេមកខ្ជះខ្ជាយអាហារទំនុកបម្រុងពួកយើងមិនធុញទ្រាន់នឹងមនុស្សកម្ជិលអស់ទាំងនោះ។
ជាមួយនឹងការភ័យខ្លាចជាពិភាល់ចម្លែកៗ យប់មួយខ្ញុំសម្រេចចិត្តធ្វើពុតជាគុ្រនក្តៅ ហើយមិនទៅជប់លៀង។ ពេលនេះខ្ញុំបានឮភ្លេងនិងសម្រែកពួកគេសប្បាយពីចម្ងាយ ដូចធ្លាប់នឹងត្រចៀក។ ដោយដឹងថា វេលាងប់ងុលការរាំច្រៀងបានមកដល់ ខ្ញុំក៏មានឱកាសក្រោកពីគ្រែលបៗចេញព័ទ្ធទៅក្រោយវិមានស្វែងរកការពិត។
នៅទីនោះ ស្នូរសំលៀងកាំបិតលាន់ឡើងបន្លំនិងស្នូរភ្លេងខាងមុខសាល។ មនុស្សមានឌធំ ទឹកមុខកោងកាចបីបួននាក់កំពុងនិយាយគ្នាថា យប់នេះជាយប់បញ្ចប់ហើយ។
ពួកគេមនុស្សខាងមុខធាត់ល្មមនឹងចាត់ការពិតមែន។
ស្តាប់បន្តិចខ្ញុំព្រឺសម្បុរភ្ញាក់ខ្លួនដឹងថា ចេតនាពិតរបស់ម្ចាស់ផ្ទះគឺសម្លាប់យើងពេលស្រវឹងយប់នេះ។ កាំបិតនិងពូថៅយមបាលដែលបានសំលៀងមិនមែនសមជាមួយសត្វព្រៃធម្មតាទេ។
យើងតាមពិតទៅ យើងបានធ្លាក់មកក្នុងកណ្ដាប់ដៃក្រុមកុលសម្ព័ន្ធចាស់មួយ ដែលធ្លាប់មានសរសេរទុកក្នុងគម្ពីរថា ជាអម្បូរមនុស្សស៊ីសាច់។
ពួកនេះមានទឹកមុខរីករាយ សម្បុរជ្រះថ្លាបញ្ញាខ្ពស់ជាងយើងធម្មតា តែពូជពង្សពួកគេតមកជាអម្បូរយូរអង្វែងដែលនិយមឆីសាច់មនុស្សដូចគ្នា។
ពួកខ្ញុំនៅខាងក្រៅដែលត្រូវបានគេចិញ្ចឹមឡើងធាត់មក តាមពិតដើម្បីបរិភោគលៀងសប្បាយអំណរ។ គេទាំងនេះទំនងជាខានបានអាហារសាច់មនុស្សជាយូរយារណាស់មកហើយ។ ខ្ញុំស្លន់ស្លោជាខ្លាំង ហើយរត់បំពួនក្បែរសាលខាងមុខបម្រុងនឹងឱ្យដំណឹងពួកមិត្តភក្តិរត់ជាមួយគ្នា ប៉ុន្តែយឺតពេលទៅហើយ ពួកគេកំពុងដេកដួលទន់ខ្លួនដោយជាតិស្រវឹង។
ពួកអ្នកគង្វាលបានបង្ហាញខ្លួនជាមួយកាំបិត ហើយចាប់ផ្តើមកាប់សម្លាប់រង្គាលលើបុរសទាំងនោះដូចសត្វ។ ខ្ញុំបានរត់វារជើងបីជើងបួនចេញទៅឆ្ងាយ តម្រង់ចូលព្រៃ ទីដែលប៉ុន្មានថ្ងៃមកនេះ បានលបសម្គាល់ឃើញផ្លូវលំមួយដែលមានការឆ្ការស្អាតទុក។
ខ្ញុំដើរតាមនោះពិតជាមិនចេះទាល់ ហើយរត់ចុះឡើងមួយយប់មួយថ្ងៃ ខ្ញុំរស់ជាមួយផ្លែប៊ឺរី ទីបំផុតខ្ញុំបានរកឃើញផ្លូវមួយទៀតនៅម្ខាងនៃបឹង។
ហែលឆ្លងបឹងនោះ ខ្ញុំរត់បន្ថែម រហូតបានច្រើនថ្ងៃមកទៀត ក៏ប្រទះឃើញជញ្ជាំងនៃកំផែងទីក្រុងដ៏ខ្ពស់អស្ចារ្យមួយ។
នៅពេលដែលខ្ញុំទៅជិតដល់ច្រកចូលទីក្រុង ខ្ញុំបានចួបជាមួយនឹងអ្នកដំណើរមួយចំនួន ដែលបររទេះធ្វើដំណើរ។ គេអាណិតសភាពទុគ៌តរបស់ខ្ញុំក៏បានឱ្យទឹកនិងចំណីហើយសួរឈ្មោះសួរទីកន្លែងដែលខ្ញុំមកពីណាទៅណា។
នៅពេលដែលពួកគេបានឮពីតំបន់កុលសម្ព័ន្ធកាចសាហាវនោះ ពួកគេបានងឿងឆ្ងល់ថាហេតុអ្វីខ្ញុំអាចរត់រួច។
តំបន់នោះច្រើនជំនាន់មកហើយ មិនដែលមានអ្នកណាហ៊ានទៅក្បែរទេ។ ឃើញរឿងរ៉ាវរួចជីវិតយ៉ាងកម្រនេះពួកគេវាយតម្លៃថា ខ្ញុំជាមនុស្សល្អ ដែលទទួលបាននូវកិច្ចការពារដ៏ភាពអស្ចារ្យពីព្រះអល់ឡោះ។ ដោយសារពួកគេងប់ជឿលើបុណ្យបាបនិងសាសនា មនុស្សទាំងនេះបានរាយការណ៍តគ្នាអំពីខ្ញុំនិងវាសនាគេចចេញពីអម្បូរឆីមនុស្ស ឮដល់ស្តេចរបស់ពួកគេ។ យប់នោះខ្ញុំស្នាក់ក្នុងកូនភូមិតូចមួយក្បែរជាយក្រុង លុះព្រឹកព្រហាមក៏ឃើញមានមន្ត្រីពីរបីនាក់បានបង្ហាញខ្លួនហើយកោះហៅខ្ញុំចូលទៅនិទានប្រាប់រឿងចិញ្ចឹមឱ្យធាត់ទុកឆី ទូលថ្វាយដល់ព្រះរាជា។
ពេលជិះរទេះសេះចូលនិងកាត់ទីក្រុង ទីប្រជុំជន ខ្ញុំនឹកស្ងើចសរសើរចំពោះផ្ទះសំណង់ល្អៗ ប្រជាជនដែលមានជីវភាពធូរធារនិងទីផ្សារដែលសំបូរទៅដោយអាហារ វត្ថុប្រណីតគ្រប់ប្រភេទ។
ខ្ញុំបានឃើញថាប្រជាពលរដ្ឋជិះសេះល្អ តម្លៃខ្ពស់ និងមានពូជសេះរឹងមាំ មានការរចនាហ្មត់ចត់ ប៉ុន្តែចម្លែកណាស់ពួកគេខ្វះកៅអី។
ខ្ញុំគិតថាជាឱកាសដ៏ល្អសម្រាប់សាងជំនួញរកលុយគឺធ្វើកែបសេះលក់។
ពេលខ្ញុំបានចូលគាល់ដល់ព្រះរាជា ខ្ញុំក៏បានទូលថ្វាយឥតលាក់លៀមនូវដំណើរដ៏គ្រោះថ្នាក់នេះពីដើមដល់ចប់ ហើយទ្រង់ក៏ទទួលលៀងអាហារដល់ខ្ញុំ ផ្តល់កន្លែងសម្រាក ដោយចិត្តសប្បុរស។ ក្រោយសណ្តាប់បណ្តារឿងរ៉ាវរបស់ខ្ញុំ ហើយព្រះអង្គចាប់អារម្មណ៍និងភ្ញាក់ផ្អើលយ៉ាងខ្លាំង។ មិនយូរប៉ុន្មានទេ ខ្ញុំបានពិពណ៌នាអំពីកៅអីស្បែកដែលខ្ញុំមានតម្រិះរចនាឡើងសម្រាប់ទ្រង់។ ពេលឮខ្ញុំរៀបរាប់អំពីកៅអីស្បែកនិងឧបករណ៍ផ្សេងទៀតដែលយើងប្រើសម្រាប់ជិះសេះប្រកបដោយផាសុកភាព ព្រះមហាក្សត្រទ្រង់ចាប់អារម្មណ៍ឱ្យខ្ញុំអាចបង្កើតមួយភ្លាមទោះត្រូវការអ្វីក្តី។
ខ្ញុំបានស្វែងរកជាងឈើដ៏ឆ្លាតវៃម្នាក់ដើម្បីកុម្ម៉ង់ធ្វើស៊ុមកៅអីនិងជាងដេរ ស្បែកដែលមានលក្ខណៈទន់និងផ្ចិតផ្ចង់។ ជាងនេះទៅទៀត ខ្ញុំបានរើសអ្នកចិញ្ចឹមដង្កូវឱ្យយកមកនូវសរសៃសូត្រដ៏ស្រស់ស្អាតផុតលេខ។
ពីរថ្ងៃក្រោយមកខ្ញុំបានយកការងារដែលស្រេចបាច់នោះទៅថ្វាយព្រះមហាក្សត្រ ហើយបានបង្ហាញទ្រង់ពីរបៀបប្រើវាដាក់លើសេះដើម្បីជិះ។
ព្រះរាជាស្រែកឡើងថា ស្នាមជាំដោយការជិះលើខ្នងសេះសំគមដែលគ្មានទ្រនាប់នឹងលែងកើតមានទៀតហើយ។ ព្រះអង្គបានប្រទានរង្វាន់ខ្ញុំនឹងបានប្រើកែបនោះធ្វើដំណើរគ្រប់ច្រកល្ហកដោយព្រះទ័យសោមនស្សា។
ការនេះបានបណ្តាលឱ្យក្រុមមន្ត្រី អភិក្រមនិងពួកអភិជនទាំងអស់នៅក្នុងស្រុកចង់បានកែបនេះជាពន្លឹក។
មហាសេដ្ឋីមួយចំនួនធំបានបញ្ជាទិញឧបករណ៍ពីខ្ញុំដើម្បីស្តុកលក់ ហើយភ្លាមៗនោះកិច្ចព្រមព្រៀងជំនួញបានធ្វើឱ្យខ្ញុំក្លាយជាអ្នកមាន។
រស់នៅទីនេះប្រមាណ៨ខែដោយសន្សំបានទ្រព្យសម្បត្តិ ដីធ្លី ផ្ទះសម្បែងនិងទាសករមកបម្រើឆ្វេងស្តាំ ស្រាប់តែថ្ងៃមួយព្រះរាជាទ្រង់ត្រាស់ហៅខ្ញុំទៅអង្គជំនុំដោយមានត្រាស់បន្ទូលថា៖
«ឈ្មួញឆ្លាតបំផុតអើយ! ឧស្សាហកម្មនិងអាជីវកម្មរបស់លោក បានកែលម្អគុណភាពជីវិតនៅក្នុងទីក្រុងរបស់យើង។ មនុស្សជាច្រើនបានយកវាទៅលក់ឆ្លងព្រំដែន នាំមកនូវមាសជាច្រើនចំណេញចូលព្រះរាជនគរនេះ! យើងរមែងគិតចង់ផ្តល់ជារង្វាន់ដល់អ្នក! នាងនឹងមកជាភរិយាដ៏ស្រស់ស្អាត ដើម្បីញ៉ាំងឱ្យអ្នកប្រាថ្នាចង់រស់ជារៀងដរាបនៅក្នុងរាជនគរដាច់សង្វែងនេះដើម្បីបន្តការងារពាណិជ្ជកម្មរបស់អ្នក»។
ដោយមិនមានអ្វីត្រូវបដិសេធ ព្រះរាជាបានកោះហៅរដ្ឋមន្ត្រីនិងសាក្សី រៀបចំមង្គលការខ្ញុំភ្លាមៗជាមួយស្ត្រីក្មេងស្រស់បំផុតមកពីគ្រួសារដ៏ថ្លៃថ្នូរ គ្រប់គ្រងអចលនទ្រព្យនិងជំនួញជាច្រើន។ ឃើញនាងភ្លាម ខ្ញុំពិតជាលង់ក្នុងស្នេហា ហើយបាននិយាយម៉ឺងម៉ាត់ចំពោះខ្លួនឯងថាពេលខ្ញុំមានឱកាសត្រលប់ទៅស្រុកកំណើតវិញ ខ្ញុំនឹងយកនាងទៅជាមួយ។
ចាប់ពីពេលនោះមក ភាពងាយស្រួលនិងវិបុលភាពរបស់ខ្ញុំដែលអស្ចារ្យរួចទៅហើយ បានបន្តកើនឡើងជានិច្ចជាកាលរហូតដល់ពេលមួយ សំណាងអាក្រក់បានវាយលុកផ្ទះអ្នកជិតខាងខ្ញុំ។ មិត្តភក្តិរបស់ខ្ញុំដែលរស់នៅក្បែរនោះបានបាត់បង់ប្រពន្ធដោយជំងឺឆ្លង។
គាត់នៅក្បែរសពជាមួយមហាទុក្ខព្រួយ។ ខ្ញុំបាននិយាយទៅលួងលោមគាត់ថា៖
«កុំយំសោកយូរពេក! ប្រពន្ធរបស់អ្នកបានរកឃើញសេចក្តីមេត្តាករុណារបស់អល់ឡោះទៅគាល់ទ្រង់ហើយ ព្រះជាម្ចាស់នឹងផ្តល់ឱ្យអ្នកដែលនៅរស់នូវអ្វីដែលប្រសើរថ្មី នេះហើយជីវិត!»
ខុសពីការស្មាន បុរសនោះស្រាប់តែស្រែកទ្រហោខ្លាំងឡើង ដល់ខ្ញុំគិតថាមិនអាចលួងលោមគាត់អ្វីទៀតបានឡើយ។ គាត់បាននិយាយជំទាលឡើងថា៖
«មកតែពីអ្នកមកពីស្រុកឆ្ងាយបានជានិយាយធូរស្រាលមិនដឹងអ្វី! ថ្ងៃនេះគេបញ្ចុះប្រពន្ធខ្ញុំ គេនឹងបញ្ចុះខ្ញុំជាមួយនាងក្នុងផ្នូរតែមួយ។ វាជាទម្លាប់របស់នគរយើង!»
ដោយភ្ញាក់ផ្អើលហួសហេតុ ខ្ញុំលែងនិយាយអ្វីចេញទៀតហើយ។
នៅថ្ងៃដដែល គេបានតុបតែងសពប្រពន្ធរបស់បុរសកំសត់នោះក្នុងសម្លៀកបំពាក់ដ៏ល្អបំផុត គ្រឿងអលង្ការ មាសនិងពេជ្រ ហើយនៅថ្ងៃបន្ទាប់មក ពួកទាហានបាននាំគ្នារៀបធ្វើដំណើរចុងក្រោយបញ្ជូនប្តីប្រពន្ធនេះទៅកាន់ផ្នូរហើយបញ្ចុះ។
គេបានដាក់ថ្មមួយយ៉ាងធំសណ្តូនសពទម្លាក់នាងចុះទៅក្នុងថ្មជ្រោះជ្រៅ បន្ទាប់មកគេយកខ្សែសរសៃវល្លិ៍មាំមកដាក់ចងក្រោមក្លៀកប្តី រួចទម្លាក់សម្រូតចុះចូលក្នុងនោះតាមពីក្រោយដោយមានទឹកសាបមួយស្បោងស្បែកសត្វនិងនំប៉័ងប្រាំពីរដុំអមទៅជាមួយ។
វិលមកផ្ទះវិញ ខ្ញុំពិតជាដេកមិនលក់ទេ។ ទីបំផុតខ្ញុំបានលបសួរអ្នកដែលនៅស្គាល់ៗថា បើប្រពន្ធជនបរទេសដូចជាខ្ញុំត្រូវស្លាប់ តើគេនឹងធ្វើចំពោះខ្ញុំដូច្នេះដែរទេ?
សំណាងអាក្រក់ ពួកគេបានឆ្លើយថា ប្រាកដណាស់ថា! ពុំនោះទេ នគរនឹងមានគ្រោះថ្នាក់។
ខ្ញុំភ័យខ្លាចជាខ្លាំងក្រោយច្បាស់លាស់នូវទំនៀមទម្លាប់ដ៏ឃោរឃៅរនេះ ប៉ុន្តែពេលវេលាចេះតែកន្លង ប្តីប្រពន្ធខ្ញុំមិនមានអ្នកណាមានបញ្ហាសុខភាពទេ។
រហូតដល់ប៉ុន្មានខែក្រោយមកទៀត នាងបានចាប់ផ្តើមមានសញ្ញាឈឺ ហើយចូលទៅគេង។ ខ្ញុំបានបួងសួងដល់អល់ឡោះ ដែលមានព្រះហឫទ័យមេត្តាប្រោសឱ្យនាងឆាប់ជាឡើងវិញ ប៉ុន្តែជំងឺរបស់នាងកាន់តែអាក្រក់ទៅៗ ហើយនាងបានលាចាកលោកទៅពិតមែន។ លុះពេទ្យឱ្យដឹងថា ប្រពន្ធខ្ញុំបានទៅពិភពលោកខាងមុខមុនទៅហើយ ទាហានបានមករៀបចំយកទាំងនាងទាំងខ្ញុំចេញបញ្ចុះ។ ខ្ញុំស្រែកឡើងថា៖
«អល់ឡោះដ៏មានមហិទ្ធិឫទ្ធិមិនដែលបានកំណត់ឱ្យមានច្បាប់បញ្ចុះសពអ្នករស់នៅជាមួយនឹងអ្នកស្លាប់ឡើយ!»។ ពួកគេមិនបានខ្វល់ឬកត់សម្គាល់អ្វីអំពីការតវ៉ារបស់ខ្ញុំទេ ប៉ុន្តែបានចាប់ខ្ញុំដោយបង្ខំ ហើយចងសម្រូតខ្ញុំចុះទៅក្នុងរូងភ្នំងងឹតជ្រៅសន្លឹមជាមួយស្បោងទឹកធំមួយនំបុ័ងប្រាំពីរដុំ តាមទំនៀមទម្លាប់របស់ពួកគេទាំងអស់ឥតប្រាសចាកអ្វី។
ពេលចុះមកដល់រហោឋាននៃបាតរណ្តៅងងឹតនោះ ខ្ញុំបាននិយាយទៅកាន់ខ្លួនឯងថាតើមានបណ្តាសាអ្វីមកលើខ្ញុំដែលត្រូវមកយកប្រពន្ធនៅទីក្រុងនេះ?
គ្មានមហាក្សត្រណាមួយជួយខ្ញុំបានទេមានតែមហិទ្ធិឫទ្ធិអល់ឡោះដ៏រុងរឿងអស្ចារ្យក្នុងបេះដូងខ្ញុំដែលប្រាប់ថា ខ្ញុំត្រូវតែរកផ្លូវរស់។
ប៉ុន្តែនៅពេលដែលខ្ញុំមើលជុំវិញខ្លួន នេះជាផ្នូរដ៏ក្រៀមក្រំ ស្អុយនិងត្រជាក់។ មិនដឹងប៉ុន្មានគូមកហើយទេដែលត្រូវបង្ខំឱ្យមកស្លាប់តាមគ្នាយ៉ាងឥតខ្លឹមសារនិងក្រៀមក្រំវេទនាក្នុងរបៀបរបបជំនឿឥតន័យនេះ។
សូម្បីតែនៅកន្លែងដ៏អាក្រក់នេះក៏ដោយ ក៏ឆន្ទៈរស់នៅ នៅតែរឹងមាំក្នុងចិត្តខ្ញុំ។ ព្រះតែងតែនៅជាមួយខ្ញុំ។ ខ្ញុំគិតហើយក៏បានសម្រេចចិត្តញ៉ាំនិងផឹកតិចៗ សន្សំសំចៃ ពង្រឹងស្មារតីតាមតែអាចធ្វើទៅបាន ដើម្បីពន្យារអាយុជីវិតនិងពេលវេលាស្វែងរកឱកាសរត់ចេញពីទីនេះ។
ដូច្នេះហើយខ្ញុំបានទ្រាំរស់នៅក្នុងភាពងងឹតនិងក្នុងចំណោមសាកសព មិនដឹងថាប៉ុន្មានថ្ងៃ យប់បានកន្លងផុតទៅនោះទេ។
ដោយចច្រប់ដើរក្នុងទីងងឹត ខ្ញុំបានរកឃើញកអាវ ខ្សែក គជ់ គ្រឿងអលង្ការ និងឈុតមាស ប្រាក់ ដែលបំពាក់ដោយត្បូងមានតម្លៃ គ្រឿងលម្អ ផ្សេងទៀតរបស់អ្នកស្លាប់។ ខ្ញុំបានប្រមូលទ្រព្យសម្បត្តិនេះហើយដាក់ក្នុងឆ្នួតក្បាលរបស់ខ្ញុំទុក។ ឱ្យតែមានឱកាសរបស់នេះនឹងទៅជាមួយខ្ញុំ វាជាជំនួយឱ្យខ្ញុំរត់បានឆ្ងាយឬអាចជួលទូកគេផង។
ទីបំផុតព្រឹកមួយភ្ញាក់រលីវៗ ខ្ញុំបានឮសូរគ្រហឹមនិងសំឡេងរញ៉េរញ៉ៃ។ ខ្ញុំបានដឹងថាសត្វមួយចំនួន ប្រហែលជាកញ្ជ្រោងឬឆ្កែ បានរកឃើញផ្លូវចុះមកក្នុងកន្លែងដ៏អាក្រក់នេះ។ ហើយបើវាអាចចូលបាន វាច្បាស់ជាអាចចេញវិញបាន។
សេចក្តីសង្ឃឹមបានរុញខ្ញុំឱ្យក្លាហានក្រោកហើយរំពៃតាមសត្វកំណាច។ ដោយសំងំសឹងមិនហ៊ានដកដង្ហើម ខ្ញុំរកឃើញកន្លៀតតូចចង្អៀតមួយដែលទាល់តែវារនិងគ្រវីក្បាលដូចដង្កូវទើបអាចធ្វើដំណើរបាន។
តាមផ្លូវរូងក្រោមដីនោះ ទីបំផុតខ្ញុំបានឃើញតម្រុយនៃពន្លឺ។ ព្រះពិតជានៅជាមួយខ្ញុំ។ ខ្ញុំបានចាកចេញពីគោលដៅនគរនោះ រត់រហូតបានជួបនឹងឈ្មួញមានអូដ្ឋ។ ពួកគេទទួលយកអលង្ការពីខ្ញុំហើយឱ្យជំនិះមកខ្ញុំព្រមទាំងបង្ហាញផ្លូវដល់ខ្ញុំទៅរកទីក្រុងមាត់សមុទ្រ។
ជាង១០ថ្ងៃឯណោះដែលខ្ញុំបានរកឃើញភូមិកំពង់ផែ ហើយបីខែក្រោយមក ខ្ញុំបានវិលមកដល់ស្រុកកំណើតវិញ។ ជាមួយគ្រឿងមាសពេជ្រក្រោមរូងភ្នំ ខ្ញុំអាចលក់បានយ៉ាងមហាសាល។ តមក ខ្ញុំតាំងចិត្តតាមរបៀបចាស់ពីមុន គឺឈប់ផ្សងព្រេង រៀនរស់នៅមួយកន្លែង ជប់លៀងនិងលួងលោមជីវិតជាមួយការបរិច្ចាគទាន។
ប៉ុន្តែច្រើនឆ្នាំក្រោយមក ភាពរំភើបនៃការធ្វើដំណើរនិងអាជីវកម្មដែលផ្លាស់ប្តូរតាមសម័យកាលបានចូលមកជំរុញឱ្យខ្ញុំបំភ្លេចចោលនូវទុក្ខលំបាកដ៏ឃោរឃៅនានា ហើយដុតរោលថា ប្រសិនមិនផ្សងព្រេងយ៉ាងក្លាហាន ខ្ញុំមិនមែនជាកូនប្រុសពិតប្រាកដម្នាក់ឡើយ។
ដូច្នេះវាបានកើតឡើងជាលើកទីប្រាំសម្រាប់ការចេញដំណើរចាកភូមិស្រុកសាជាថ្មីទៀត។ លើកនេះនៅកំពង់ផែ Basrah ខ្ញុំបានសន្សំគំនិតរកមើលកប៉ាល់ដែលមានកម្ពស់និងរូបរាងល្អ។ បើរកមិនឃើញខ្ញុំមិនចេញដំណើរទេ រហូតដល់រកឃើញសំពៅគ្រឿងចក្រទំនើបផុតសម័យកាលមួយជាទីទុកចិត្ត ពេញភ្នែករបស់ខ្ញុំ ខ្ញុំក៏ពុះកញ្ជ្រោលជាមួយវា។
កាលខ្ញុំជាអ្នកមានស្រាប់ ខ្ញុំអាចទិញវាបានភ្លាមៗមិនលំបាកទេ។ បន្ទាប់មកខ្ញុំបានជួលប្រធានក្រុមនិងនាវិកមាឌធំមានសមត្ថភាពខ្ពស់។
ទាសករបានផ្ទុកទំនិញរបស់ខ្ញុំនៅលើកប៉ាល់ ហើយឈ្មួញផ្សេងទៀតបានបង់ប្រាក់ឱ្យខ្ញុំ ដើម្បីចេញដំណើរជាមួយគ្នា។ តាមវិធីនេះ ខ្ញុំរកលុយបានចំណេញសូម្បីតែមិនទាន់ទាំងដល់ពេលចេញដំណើរផង។
មិនយូរប៉ុន្មានយើងជិះទូកលើស្រះរបស់អល់ឡោះ ពីទីក្រុងមួយទៅទីក្រុងមួយ ពីកោះមួយទៅកោះមួយ ពីសមុទ្រមួយទៅសមុទ្រ។ គ្រប់មធ្យោបាយទាំងអស់ ពួកយើងបានសប្បាយរីករាយ ដោយប្រមូលប្រាក់ចំណេញដែលយើងរកបាន។
គ្មានកីឡាណាអស្ចារ្យជាងការលេងសើចរកប្រាក់ដោយបញ្ញានៅលើទីផ្សារនោះទេ។ ទំនិញនិងលុយផ្លាស់ប្តូរដៃមនុស្ស គ្រប់ទីកន្លែងដែលមនុស្សអាចធ្វើបានដោយពឹងលើខួរក្បាលរបស់ពួកគេ។
ដូច្នេះហើយ ដំណើររបស់យើងក៏រីកចម្រើនរហូតដល់ថ្ងៃមួយ យើងបានទៅដល់កោះតូចមួយអណ្តែតក្នុងសមុទ្រ។
ខ្ញុំមិនមានចំណាប់អារម្មណ៍អ្វីពិសេសនៅកន្លែងស្ងាត់ជ្រងំនោះទេ តែនៅលើសំពៅគេពិភាក្សាគ្នាស្រួចស្រាល់អំពីថា ឈ្មួញខ្លះធ្លាប់ឮអំពីកោះនេះនិងអាថ៌កំបាំងរបស់វា គេថាចង់ស៊ើបអង្កេតរកថ្មចម្លែកមួយប្រភេទនៅច្រាំងសមុទ្រនៃកោះនោះដែលជាសិលាកម្រត្រូវបានរាជវង្សនានាប៉ុនប៉ងប្រាថ្នា។ ព័ត៌មានទាំងនេះដូចជាទាក់ចិត្តខ្ញុំដែរ ក្នុងនាមជាអភិជនម្នាក់ ខ្ញុំពិតជាចង់ឃើញរបស់អស្ចារ្យដូចគេដូចឯង ដូច្នេះហើយខ្ញុំក៏សម្រេចចិត្តទៅលើកោះនោះ។
នៅពេលដែលសំពៅអែបឆ្នេរ ពួកគេរត់ទៅរកផ្ទៃថ្មសស្គុសរលោងនិងចំកោងយ៉ាងប្រណីត។ ខ្ញុំវិញពិតជាសង្ស័យខ្លាំង ខ្ញុំថយមកឆ្ងាយហើយគិតថាផ្ទៃរលោងរបស់វា មានអារម្មណ៍ដូចជាស៊ុតសត្វមិនមែនសិលាកម្រអ្វីទាំងអស់។
ដូច្នេះពេលពួកឈ្មួញឱ្យទាសករពួកគេគប់ថ្មនោះផូង ក៏វាត្រូវប្រេះហើយមានផ្នូកទឹកហូរចេញមកពីចំណុចរហែក។
ពីខាងក្នុង ខ្ញុំរន្ធត់ព្រោះឃើញកូនមាន់ដ៏ធំមួយនៅមិនទាន់ដុះរោមជិត។
ឈ្មួញទាំងនោះបានមូលគំនិតគ្នាសម្រាកចតទីនេះមួយយប់ នឹងយកមាន់ខ្ចីធ្វើអាហារពេលល្ងាចស្រស់ៗដែលយើងខានហូបជាយូរមកហើយ។
ខ្ញុំដែលធ្លាប់ឆ្លងកាត់ជីវិតចម្លែកមួយអន្លើ ពេលនេះផុសចេញអារម្មណ៍មិនល្អភ្លាមៗដូចកាលពីមុនវិញ។ នៅពេលក្លិនសាច់អាំងបានប៉ះរន្ធច្រមុះខ្ញុំ ខ្ញុំទ្រាំប្រឆាំងនឹងការស្រេកឃ្លានដោយបន្តដេកក្នុងបន្ទប់ឃ្លុបផ្ទាល់ខ្លួនដដែល ខណៈត្រចៀកនេះបានលបផ្ទៀងស្តាប់ឮថាពួកឈ្មួញសប្បាយចិត្តកម្រិតណាពេលធ្វើពិធីជប់លៀងលើកោះ។
អ្វីមួយបានរត់ឡើងក្នុងគំនិតខ្ញុំគឺថា នៅក្នុងព្រះនាមនៃអល់ឡោះដ៏មានព្រះហឫទ័យ ព្រះទ័យមេត្តាករុណានិងមហិទ្ធិឫទ្ធិ ពួកនេះនឹងត្រូវវិនាសដែលបានសម្លាប់កូនរបស់សត្វមេធំផុតលោកមួយក្បាល។ រាងកូនគេបង្ហាញថាម្តាយគេអាចជាបក្សីដ៏មហិមា ដែលនឹងត្រលប់វិលមកវិញឆាប់ៗ ហើយសងសឹក។
ខ្ញុំរត់ចេញមកប្រកូកព្រមានអំពីភាពល្ងង់ខ្លៅនេះ ធ្វើឱ្យអ្នកខ្លះព្រមបោះបង់ចោលការសប្បាយ ហែលឆ្លងមកលើកប៉ាល់ឡើងវិញ ហើយអ្នកនៅសល់យើងក៏សម្រេចចិត្តចេញចោលព្រោះសន្ធឹកខ្យល់លាន់មកពីចម្ងាយ។
ពិតណាស់ ពេលសំពៅមិនទាន់បានលូនចេញណាឆ្ងាយផង យើងបានឃើញស្រមោលទទះស្លាបនៃបក្សីយក្ស។
វាបានហោះមកដល់កោះហើយបោះពួយចឹកឆីមនុស្សទាំងអស់ជុំវិញសពអាំងឆ្អើរនៃកូនវា។
យើងនៅទីនេះ តក់ស្លុតព្រោះសត្វនោះមិនត្រឹមមិនព្រមបញ្ចប់ ថែមទាំងស្រែកខ្លោចផ្សាងាកក្បាលមករកសំពៅយើង។
វាបានឱបផ្ទាំងថ្មភ្នំដ៏ធំមួយនៅក្នុងដៃក្រញាំហើយហោះបោះពួយសំដៅមក។
ខ្ញុំបានយំបួងសួង។
កម្លាំងហោះរបស់វាអាចត្រួត១០០ដងរហ័សជាងសំពៅយើង។ រីឯស្លាបវា បើបក់ដល់ឯណា រលកទឹកសមុទ្រក៏បោកទង្គិចងងឹតងងល់ជុំវិញនោះអស់លែងមើលឃើញអ្វីជាទិស។ មិនយូរទេ វាសំកាំងចំពីលើយើង ហើយទម្លាក់បន្ទុកថ្មភ្នំមួយទំហឹងពីមុខយើង។
កម្លាំងផ្ទាំងថ្មបានពង្រាបទឹកនិងបានបើកបង្ហាញបាតសមុទ្ររូងចុះក្រោម។ សំពៅនេះមិនអាចទប់ជំហរបានទេ។
យើងទាំងអស់គ្នាបានរអិលចូលទៅក្នុងរណ្ដៅដ៏ធំ មុនពេលត្រូវបានបោះឡើងមកអាកាសម្តងទៀតហើយធ្លាក់ចុះទង្គិចនឹងកម្លាំងរលកយក្ស។
កប៉ាល់របស់យើងមិនលិច តែវាបានខ្ទេចយង់ទៅជាបំណែកមើលលែងឃើញក្នុងមហាសាគរ។ ខ្ញុំបានហែលអស់ដៃជើង ក្នុងចំណោមកម្រាលទឹកដែលហក់ឡើង ហើយចាប់បានបំណែកមួយមកបណ្តែតខ្លួន។ ដោយមានការទ្រទ្រង់ពីព្រះ ខ្ញុំបានត្រូវបានអណ្តែតទាំងសន្លប់ឈឹងនិងដឹងខ្លួនមកវិញនៅលើឆ្នេរនៃកោះមួយទៀត។
នេះជារបៀបដែលជីវិតផ្សងព្រេងសែនខ្លាចរអា បានកើតមានសាជាថ្មី។
អម្បូរយក្សឬសត្វចម្លែក ឬកុលសម្ព័ន្ធឆីសាច់បានលេចឡើងមកក្នុងការគិតរបស់ខ្ញុំ។ ខ្ញុំឱបដៃ កណ្តាលភាពឯកោរងា គ្មានអ្នកណាម្នាក់មានជីវិតនៅក្បែរទេ។
ព្រះអល់ឡោះអើយ! ខ្ញុំស្រែកថ្ងូររកទ្រង់ទាំងអស់សង្ឃឹម។ ទោះយ៉ាងណា នៅពេលក្រពះទារ ខ្ញុំបានក្រោកដើរហើយស្វែងរកចំណីអាហារ។
ការត្រាច់ចរម្នាក់ឯងសំដៅស្រមោលធម្មជាតិ បានជំរុញខ្លួនខ្ញុំធ្លាក់ទៅដល់ឋានមួយប្រភេទ ដែលជាចម្ការគ្របក្រាលដោយបុស្បា ផ្កាដែលមានក្លិនក្រអូបឈ្ងុយឆ្ងាញ់ មានកម្លាំង និងបណ្តាដើមរុក្ខាពេញដោយផ្លែឈើព្យួរទាបខ្ពស់គួរឱ្យឈ្ងុយឆ្ងាញ់ មិនអាចកាត់ចិត្តបាន។
បានផ្លែទាំងនោះចម្អែត ខ្ញុំលង់លក់យ៉ាងស្លុងលែងដឹងអ្វីនៅក្បែរអូរដែលមានទឹកហូរថ្លា និងបក្សាបក្សីច្រវាត់។ ពេលព្រឹកឡើង ខ្ញុំឃើញបុរសចំណាស់ម្នាក់ស្លៀកសំពត់ស្លឹកត្នោត អង្គុយច្រង៉ុកនៅមិនឆ្ងាយពីខ្ញុំ ហើយសម្លឹងមើលមក។
ខ្ញុំសប្បាយចិត្តខ្លាំងពេលឃើញមានមនុស្សម្នាក់ទៀត។
យ៉ាងហោចណាស់ខ្ញុំនឹងអាចដឹងថា ទីនេះជាកន្លែងណា មានផ្សារឬមធ្យោបាយចាកចេញដែរទេ។ ឃើញខ្ញុំញញឹម គាត់បានធ្វើសញ្ញា ដូចជាសុំឱ្យខ្ញុំលើកគាត់ឡើងលើស្មាខ្ញុំ ហើយដឹកគាត់ឆ្លងកាត់ទឹកអូរផង។ ខ្ញុំបានគិតខ្លួនឯងថា៖
«ខ្ញុំជាមនុស្សរបស់ស្ថានសួគ៌ ព្រះអល់ឡោះបានបណ្តាលមកឱ្យខ្ញុំចួបនឹងជួយបុរសចំណាស់នេះ!»
គិតហើយខ្ញុំក៏បានរីករាយធ្វើតាមដូចដែលគាត់បានស្នើសុំ ហើយឱនដាក់គាត់ឡើងលើស្មារបស់ខ្ញុំ។ ខ្ញុំបានដើរឆ្លងកាត់ទឹកយ៉ាងត្រដាបត្រដួសប៉ុន្តែមិនត្អូញត្អែរអ្វីទាំងអស់។
ទីបំផុតទម្រាំមកដល់ម្ខាងទៀត ខ្ញុំហត់សឹងដាច់ខ្យល់ ហើយលុតជង្គង់ចុះ ដាក់ឱ្យគាត់ចុះលើដីវិញ ស្រាប់តែប៉ុន្តែគាត់មិនព្រមចុះ។
ជននេះមិនបានចាកចេញពីស្មារបស់ខ្ញុំទេ ជំនួសមកវិញ រឹតតែបានរុំព័ទ្ធជើងទាំងពីរជុំវិញក ដោយច្របាច់ដង្ហើមខ្ញុំតឹងឡើងយ៉ាងពិបាកដកដង្ហើម។ ខ្ញុំមានគំនិតថា ជននេះមិនព្រមចុះទេ ដូច្នេះក៏បោចជើងគាត់ បែរជាត្រូវគាត់វាយសំពងមកលើក្បាលខ្ញុំបែកអំពិលអំពែក ដូចវាយក្បាលត្រី ធ្វើឱ្យខ្ញុំខ្សោយមិនអាចរលាស់និងផ្តួលយ៉ាងណាក៏នៅតែស្អិតជាប់ ហើយរឹតកខ្ញុំផង វាយក្បាលខ្ញុំផង។ គេមានជើងមករុំកខ្ញុំ ឯដៃគេពីរទំនេរទុកវាយខ្ញុំ ចំណែកជើងខ្ញុំជាប់ឈរ មិនអាចប្រើធ្វើអ្វីគេបានមានតែដៃពីរ ខ្ញុំក៏ចាញ់ដង្ហក់ ហើយមួយសន្ទុះក៏ដួលសន្លប់បាត់បង់ស្មារតី។ ពេលបានដឹងខ្លួនឡើងមកវិញ ក៏មានអារម្មណ៍ថា បុរសប្រឡាំងកាសនេះ នៅតែជាប់នៅលើស្មារបស់ខ្ញុំ ហើយកំពុងទាត់ដាស់ខ្ញុំឡើង។
ការឈឺចាប់ ដែលជននេះកំពុងផ្តល់មកគឺបង្ខំឱ្យខ្ញុំងើបឡើងដើរទៅមុខ រួចចង្អុលឱ្យខ្ញុំលីទៅកណ្តាលចម្ការដើមឈើហូបផ្លែ ដើម្បីឱ្យអាចឈោងយកអ្វីដែលគាត់ចង់យកទៅហូប។ ខ្ញុំចង់ឱ្យតានេះដាច់ពោះ បានបដិសេធមិនព្រមទៅ តាកញ្ចាស់ក៏វាយក្បាលខ្ញុំយ៉ាងឈឺចាប់ និងច្របាច់កខ្ញុំរហូតទ័លច្រកត្រូវធ្វើតាម។
រឿងនេះបានបន្តគ្មានឈប់ ហើយថ្ងៃខ្លះខ្ញុំបានត្រូវបង្ខំឱ្យលីជននេះដើរសឹងតែជុំវិញកោះដូចជាខ្ញុំនេះជាពាហនៈ។ បើខ្ញុំហត់ឬបង្អង់ ក៏សំពោងខ្ញុំយ៉ាងលីលា។ ខ្ញុំមានតាកញ្ចាស់នៅពីលើបីថ្ងៃមានអារម្មណ៍ខ្លួនឯងជាសត្វ មិនមែនមនុស្សទៀតទេ។ នៅពេលយប់ឡើងទោះខ្ញុំបានដេក ឬមិនដេក ជើងជនចង្រៃនៅតែថ្ពក់ជាប់នឹងករបស់ខ្ញុំ។ គ្មានអ្វីដែលខ្ញុំអាចធ្វើបានដើម្បីអង្រួនទម្លាក់ជនចង្រៃនេះចេញទេ ទោះជាខ្ញុំបានព្យាយាមតាមដែលខ្ញុំអាចធ្វើច្រើនលើក នៅតែត្រូវជននេះវាយសំពោងស្ទើរក្ស័យ។ ពីមួយថ្ងៃទៅមួយថ្ងៃ ខ្ញុំកាន់តែខ្សោយទៅៗនិងខ្លាចការសំពោងសឹងមិនហ៊ានកម្រើក។
ខ្ញុំចាប់ផ្ដើមដាក់បណ្ដាសាក្រោធខឹងលើសេចក្ដីសប្បុរសរបស់ខ្លួនថា៖
«ដោយគុណអល់ឡោះ! ដរាបណាខ្ញុំនៅមានជីវិត ខ្ញុំនឹងមិនធ្វើសប្បុរស សម្រាប់ជនឯណាទៀតទេ! គំនិតតែជួយមនុស្សម្នាក់នេះហើយ គាត់បានសងខ្ញុំពីទុក្ខលំបាកប៉ុនសាគរ»។
មិនយូរប៉ុន្មាន ខ្ញុំបានអង្វរដល់ព្រះដ៏ខ្ពង់ខ្ពស់បំផុត សូមទ្រង់បំបាត់ភាពតានតឹងនិងភាពនឿយហត់របស់ខ្ញុំ ដោយសូមឱ្យខ្ញុំស្លាប់ទៅចុះ ប៉ុន្តែព្រះអង្គដែលមានសិរីរុងរឿងនិងមានព្រះហឫទ័យមេត្តាករុណា មានផែនការផ្សេងសម្រាប់ខ្ញុំ។
វាបានកើតឡើងនៅថ្ងៃមួយដែលយើងបានមកដល់ផ្នែកផ្សេងនៃកោះដែលដីត្រូវបានគ្របដណ្តប់ដោយស្មៅ។ ទាំងនេះជាចម្ការហូបផ្លែធំៗនិងមានសម្បកខាងក្រៅរឹង។ គំនិតមួយបានមករកខ្ញុំ ដើម្បីបំបាត់ការឈឺចាប់លើស្មានេះ។ ខ្ញុំកាច់ផ្លែឃ្លោកមួយចំនួនចេញ ហើយយកសាច់ផ្លែខាងក្រៅមកធ្វើជាដប។ បន្ទាប់មក ខ្ញុំបានប្រមូលផ្លែទំពាំងបាយជូរដែលដុះនៅក្បែរៗនោះ ហើយដាក់ក្នុងផ្លែឃ្លោក សង្កត់កិនវាដោយថ្ម។
បន្ទាប់ពីទុកដបឃ្លោកទាំងនេះនៅក្រោមពន្លឺថ្ងៃអស់រយៈពេលពីរបីថ្ងៃ ជាតិអាល់កុលក៏ត្រូវបានបង្កាត់ហើយប្រែទៅជាស្រាដ៏ខ្លាំងមួយប្រភេទ។ ល្ងាចមួយខ្ញុំបានផឹកវាហើយរាល់ភាពឈឺចាប់សន្លាក់ឆ្អឹងរបស់ខ្ញុំបានថយចុះ ហើយខ្ញុំបាត់បង់ចាប់ផ្ដើមច្រៀង ទះដៃ ហើយលោតលេងពីជើងមួយទៅជើងម្ខាង ជាមួយបុរសចំណាស់នៅលើខ្នងខ្ញុំ។ បុរសចំណាស់បានតោងចាប់ខ្ញុំនៅលើស្មា។ ដោយយល់ពីអ្វីដែលគាត់ចង់បាន ខ្ញុំក៏ហុចស្រាទំពាំងបាយជូរមួយដបទៅគាត់។ គាត់ក៏ផឹកពីវា ហើយចាប់ផ្តើមរីករាយ។ មិនយូរប៉ុន្មាន គាត់ក៏ទាមទារយកមួយទៀត ហើយខ្ញុំក៏ឱ្យតាមតម្រូវការ រហូតទាល់តែស្រាបានយកប្រៀបលើគាត់ ហើយគាត់បានដេកលក់ស្ររឹង។ ជាលើកដំបូងក្នុងរយៈពេលប៉ុន្មានសប្តាហ៍នេះ ខ្ញុំមានអារម្មណ៍ថា ការចាប់ជើងព័ទ្ធជើងជននេះនៅជុំវិញករបស់ខ្ញុំបានធូររលុង។ ឆ្លៀតឱកាស ខ្ញុំបានបោះតាចាស់កញ្ចាស់ចេញពីស្មារបស់ខ្ញុំទៅលើដី។ ជននេះបើកភ្នែកព្រឹមៗសម្លឹងខ្ញុំទាំងស្រវឹងខ្លះដឹងខ្លួនខ្លះ។ ដំបូងឡើយខ្ញុំចង់ចាកចេញ រត់សប្បាយនឹងការទទួលបានសេរីភាពរបស់ខ្ញុំមកវិញ តែពេលក្រឡេកមើលបិសាចនេះកាលណា ខ្ញុំយល់ថានឹងមានអ្នកផ្សេងក្រោយៗដែលនឹងត្រូវចាញ់បោកតានេះឱ្យកៀបស្លាប់ដូចសត្វមិនខាន។
ឬមួយបើ ខ្ញុំនៅវង្វេងលើកោះ ពេលខ្ញុំដេក វានឹងឡើងមកចងកខ្ញុំម្តងទៀតក៏ថាបាន។ ខ្ញុំបានបកទៅស្វែងរកថ្មដ៏ធំមួយ ហើយប្រើវាទម្លាក់សម្លាប់កញ្ចាស់កំណាចបង់ជីវិតទាំងខ្ញុំគ្មានវប្បដិសារៈ គ្មានសេចក្តីមេត្តាករុណាអ្វីលើជនអបលក្ខណ៍នេះទេ។ មនុស្សរស់នៅជាសត្វឈ្លើង ទុកខ្ញុំជាសត្វយូរមកហើយ។
រួចរាល់នូវការសងសឹក ខ្ញុំបានបកត្រលប់ទៅកាន់ច្រាំងវិញ ក្នុងចិត្តពោរពេញដោយសេចក្តីសុខ រាងកាយស្រាលដូចបានរស់ម្តងទៀត។
៥ថ្ងៃក្រោយមក មានកប៉ាល់មួយដើរទឹកមកពីចម្ងាយ។ ខ្ញុំបានផ្តល់សញ្ញាយ៉ាងសកម្មទៅកាន់នាវិក ហើយមិនយូរប៉ុន្មាន ខ្លួនខ្ញុំក៏ត្រូវបានការសង្គ្រោះពីឋានសួគ៌ចាកចេញពីកោះបណ្តាសាទុក្ខទោម្នេញដូចនរកនេះ។
ពេលសម្រាកហូបចុកដែលខ្ញុំបានតំណាលប្រាប់ក្រុមឈ្មួញនិងនាយនាវិកពីរឿងទាំងអស់ដែលបានកើតឡើងជាមួយកញ្ចាស់កំណាច មានម្នាក់បានងក់ក្បាលហើយប្រាប់ខ្ញុំថាបុរសដែលជិះលើស្មារបស់ខ្ញុំត្រូវបានអ្នកស្រុកនេះគេហៅថា Shaykh al-Bahir ដែលជាបុរសធ្លាប់ដើរសមុទ្រនិងមានជំងឺខ្វិន។ ជននេះមានចិត្តសាហាវឃោរឃៅ ហើយគ្មាននរណាម្នាក់ដែលត្រូវគាត់បោកប្រាស់អាចរស់បានយូរទេ គឺគាត់តោងដល់ស្លាប់ទើបចាកចេញ។
សំពៅបានដឹកខ្ញុំទៅកាន់កោះបន្ទាប់ ដែលទីនោះមានរាជធានីធំមួយឈ្មោះថា ទីក្រុងនៃ Apes ។ នៅទីនោះ សូម្បីតែជញ្ជាំងកំផែងដែលមើលពីចម្ងាយទៅក៏ឃើញមិនរឹងមាំ អាចការពារប្រជាជនពីជោគវាសនានៃរលកសមុទ្រឬព្យុះព្យោមាដែរ។
សូម្បីតែជាមួយសត្វឧត្បាតចង្រៃ។ តួយ៉ាងរៀងរាល់ល្ងាច ពេលយប់មកដល់មេឃងងឹត សត្វស្វាចុះពីដើមឈើមកលុកលុយទីក្រុង។ ដើម្បីចៀសវាងពីការយាយី ប្រជាជនគ្មានជម្រើសអ្វីក្រៅពីចាកចេញពីផ្ទះទៅដេកពួនក្នុងទូក។
អាជីវកម្មមួយចំនួនអាចរកលុយបានយ៉ាងច្រើនបំផុតពីសំណាងអាក្រក់នៃពលរដ្ឋតំបន់នេះ។ ជារៀងរាល់ថ្ងៃ ពួកគេបានប្រមូលគ្រួសនៅលើឆ្នេរ ហើយបន្ទាប់មកបានឈានជើងចូលក្បែរព្រៃបន្តិច ហើយគប់សត្វស្វាដែលរស់នៅតាមដើមឈើ។ សត្វស្វាបានឆ្លើយតបដោយការបោះផ្លែដូងមកវិញ។ ការប្រយុទ្ធគ្នារវាងថ្មនិងដូងនេះ បានកើតឡើងជារៀងរាល់ថ្ងៃ ប៉ុន្តែមានភាពយុត្តិធម៌ ព្រោះអ្នកជំនួញដែលហានក្លា បាននាំគ្នារើសដូងយកទៅលក់ដូរនៅលើទីផ្សារ។ ខ្ញុំបានចូលរួមក្នុងកីឡាដ៏គួរឱ្យអស់សំណើច ប៉ុន្តែប្រកបដោយគ្រោះថ្នាក់នេះដែរ ហើយអល់ឡោះបានអនុញ្ញាតឱ្យខ្ញុំរកបានប្រាក់ចំណេញដោយយុត្តិធម៌ពីមួយថ្ងៃទៅមួយថ្ងៃ រហូតដល់ខ្ញុំបានប្រមូលប្រាក់សន្សំបានយ៉ាងច្រើន។
ពេលខ្ញុំសុខសប្បាយម្ដងទៀត ខ្ញុំបានជួលកៅអីមួយកន្លែងនៅលើកប៉ាល់ធំមួយដែលបានឆ្លងកាត់កោះនេះហើយធ្វើដំណើរត្រលប់មកផ្ទះវិញ។
ខ្ញុំបានជួញដូរមាសរបស់ខ្ញុំជាមួយការទិញដូរគជ់តាមផ្លូវទឹក ហើយទទួលបានប្រាក់ចំណេញកាន់តែខ្លាំង។ នៅពេលដែលខ្ញុំបានទៅដល់កំពង់ផែនៃក្រុង Basrah ក្រោយដំណើរលើកទីប្រាំ ខ្ញុំបានប្រមូលទ្រព្យសម្បត្តិចែកចាយជាចំណែកខ្លះដល់អ្នកក្រីក្រ។
ដំណើរផ្សងព្រេងលើកទី៦
ពេញរយៈពេល៣ឆ្នាំ ខ្ញុំតែងតែខ្លាចរន្ធត់ចំពោះមនុស្សពិការជើង ឬជនចំណាស់សុំទានស្គមកំព្រឹងណាម្នាក់ដែលដើរកាត់។ ព្រលឹងខ្ញុំនៅតែត្រូវលងដោយមនុស្សបញ្ញើក្អែកដែលបានធ្វើទារុណកម្មក្បាលនិងស្មាខ្ញុំសឹងអស់ជីវិតម្តងៗ។ វាជាការចងចាំមួយដែលខ្ញុំស្បថថា នឹងមិនឱ្យអ្នកណាអាចមកជិះលើស្មា ឬសូម្បីខ្នងខ្ញុំជាដាច់ខាតក្នុងជាតិនេះ។
មិនយូរប៉ុន្មានសេចក្តីប្រាថ្នាចង់ធ្វើដំណើរបានរុកកួនខ្ញុំទៀតហើយ។ ទោះណាជាខ្ញុំមានទ្រព្យសម្បត្តិគ្រប់យ៉ាងដែលអ្នកណាក៏ត្រូវការ ប៉ុន្តែខ្ញុំនៅតែស្រលាញ់ពេញចិត្តក្នុងការធ្វើដំណើរផ្សងព្រេងដើម្បីស្វែងរកពិសោធន៍និងរសជាតិជីវិតបន្ថែមលើគំនរទ្រព្យសម្បត្តិរបស់ខ្ញុំ។
ជាថ្មីម្តងទៀត ខ្ញុំបានធ្វើការវេចខ្ចប់ទំនិញរបស់ខ្ញុំ ហើយធ្វើដំណើរទៅកាន់កំពង់ផែ Basrah។ ខ្ញុំបានជិះកប៉ាល់ដ៏ល្អមួយ ធ្វើដំណើររួមជាមួយឈ្មួញមួយក្រុមទៀត ចល័តពីកោះមួយទៅកោះមួយ ទីក្រុងមួយចូលទីប្រជុំជនមួយទៀត ដោយជួញដូរផងសិក្សាដើម្បីជីវិតផង។
ហាក់ដូចជា សំណាងតែងតែញញឹមដាក់ក្រុមយើង គ្រប់យ៉ាងបានរលូន ប៉ុន្តែនៅថ្ងៃមួយ បន្ទាប់ពីការធ្វើដំណើរដ៏វែងឆ្ងាយ មេក្រុមនាវិកកើតការសង្ស័យចំពោះសញ្ញាចម្លែកនៅលើមេឃ ក៏បានឡើងទៅលើបង្គោលនាវាហើយពិនិត្យ។
មិនយូរទេគាត់វារចុះមកវិញហើយលុតជង្គង់ចាប់ផ្តើមយំដកពុកចង្កាស្រែកថា៖
«អូ អល់ឡោះអើយ! កូនៗខ្ញុំនឹងកំព្រា!»
យើងមិនដឹងថាមានអ្វីនៅខាងមុខនោះទេ ប៉ុន្តែដោយសារការថ្នឹកជាមួយគ្រោះថ្នាក់ ខ្ញុំផ្តើមរៀបចំបង្វិចនិងចងអលង្ការ លុយកាក់។
ទីបំផុតនាវិកចំណាស់សារភាពប្រាប់ថា យើងបានវង្វេងផ្លូវ ហើយជិះទូកធ្លោយដល់ដែនសមុទ្រដែលមិនមានអ្នកណាធ្លាប់ឆ្លងកាត់និងស្គាល់ទិសតំបន់។
«យើងមិនអាចរកផ្លូវត្រលប់ទៅផ្ទះបានទេ!» គាត់បានស្រែកយំ។ អ្វីៗបានប្រែទៅជាអាក្រក់បន្ថែមខណៈនាវិកម្នាក់ស្រែកឡើងចង្កូតថា៖
«ជួយមើល៍ឱ្យច្បាស់ជំនួសខ្ញុំផង យើងកំពុងបុកកំផែងថ្មនៅខាងមុខឬអ្វី?»
គ្មានមនុស្សធម្មតាណាម្នាក់ អាចរារាំងអ្វីដែលកំណត់ទុកដោយជោគវាសនាឡើយ។ ភ្លាមៗនោះខ្យល់ដ៏ខ្លាំងនិងខុសទិស ក៏បក់បោកស្រោចដល់ឃ្លោងកប៉ាល់របស់យើង។
ខ្យល់ខ្លាំងឡើងៗបានបង្វិលសំពៅនេះវិលជុំវិញបីដងមុនពេលសម្បកត្រូវបានហែកចេញពីដែកនិងមេធ្នឹម។ យើងទាំងអស់គ្នាបានធ្លាក់ចូលទៅក្នុងសមុទ្រ។ ពួកយើងជាច្រើននាក់បានលង់ទឹក ប៉ុន្តែខ្ញុំជាមនុស្សម្នាក់ក្នុងចំណោមអ្នកដែលបានរួចជីវិតដោយមានត្រៀមរបស់តោង តែខ្ញុំមានរបួសនិងស្នាមជាំ សឹងថាពាក់កណ្តាលស្លាប់។
ដោយភាពនឿយហត់ ខ្ញុំបានស្រវាឱបលើផ្ទាំងថ្មដែលរាយប៉ាយលើឆ្នេរចម្លែក។ ភ្នែកខ្ញុំខំសម្លឹងពាសពេញកោះនេះ។ ពុទ្ធោ! ថ្មដ៏មានតម្លៃ ត្បូងគ្រប់ប្រភេទ បានរោយរាយចោលនៅជុំវិញនេះដូចជាគ្រួសធម្មតា។
ពេលស្រមោលព្រះទនិករចោលមក គ្រប់យ៉ាងបញ្ចេញពន្លឺ។ មានគ្រប់ពេជ្រជាច្រើនលេចដុះចេញមកស្ពឹមលើដី។
ខ្ញុំមានកម្លាំងពេលឃើញរតនៈវត្ថុ ក៏ក្រោកហើយវារទៅរើសគជ់រាជមួយក្តាប់តូច មកលាពិនិត្យក្នុងបាតដៃ។
វត្ថុទាំងនេះសូម្បីក្សត្រខ្លះក៏មិនងាយមានជាកម្មសិទ្ធិផង កុំថាគ្រួសារអ្នកមានទ្រព្យធម្មតាៗ។ មិនតែប៉ុណ្ណោះ សូម្បីលើផ្ទៃទឹកសមុទ្រក៏មានពន្លឺចាំងជះមកដែរ។ ជាមាសអណ្តែតទឹក? ធ្លាប់ឮថា មានធាតុមាសក្រហមឆ្អិនដែលត្រូវបានផលិតនៅក្នុងពោះរបស់សត្វចម្លែកសមុទ្រមួយប្រភេទ ហើយពេលវេលាត្រូវខ្ជាក់ វាក៏ខ្ជាក់មាសឱ្យផុសឡើងអណ្តែតលើផ្ទៃទឹក?
ឈ្មួញផ្សេងទៀតបានភាំងដូចជាមនុស្សឆ្កួតហើយឈរឆ្ងល់នៅទីនេះ។ ម្នាក់ៗសរសើរស្នាដៃរបស់អល់ឡោះនិងអាថ៌កំបាំងដ៏ស្រស់ប្រណីតនៃធម្មជាតិក្នុងភពផែនដី។
យើងរត់ប្រសាចប្រមូលវត្ថុមានតម្លៃជាច្រើន តាមដែលអាចយកបានរៀងៗខ្លួន។ ប៉ុន្តែគ្មានកន្លែងណាដែលយើងអាចរកឃើញមានអ្នកស្រុករស់នៅក្រៅតែពីលេចវាលចូលព្រៃដ៏ក្រាស់ បន្ទាប់មកគឺវាលស្មៅបៃតងខ្ចីលាតសន្ធឹងគ្មានស្តេចចតុបាទមកដណ្តើមបរិភោគឡើយ។
យូរៗទៅ ក្រុមយើងកាន់តែខ្សោយទៅៗហើយអ្នកខ្លះក៏បានគ្រុនក្តៅឬឈឺស្លាប់។ មិនយូរប៉ុន្មាន មនុស្សទាំងអស់បានស្លាប់។ សាជាថ្មីខ្ញុំជាជនទុរន់ទុរាសេសសល់ក្រោយគេដែលបានលាក់លបអាហារក្រៀមនិងទឹកឃ្មុំដោយសារបទពិសោធន៍មុនៗ។
ទឹកឃ្មុំវាអាចបង្ការជំងឺជាច្រើន ទោះរាកឬគ្រុនក្តៅក៏មិនងាយកើតមានឡើងដែរ។ ខ្ញុំបានត្រាច់ចរដើម្បីរុករកកោះនេះបន្ថែមទៀត ដើម្បីមើលថាតើនឹងមានអ្នកស្រុករស់នៅដែរ?
បន្ទាប់ពីអាហារជិតអស់ ខ្ញុំមិនអាចរង់ចាំដល់ពេលដើរមិនរួចនោះទេ ខ្ញុំបានមកដល់ទន្លេមួយ ដោយផ្តើមរកមែកឈើជាច្រើនមកចងធ្វើក្បូនហើយផ្ទុកដោយទំនិញដ៏មានតម្លៃ ទាំងនោះទៅជាមួយ។ ពេលខ្ញុំជិះទូក ខ្ញុំសូត្រកំណាព្យថា «ហោះហើរ ឆ្លងកាត់សមុទ្រ ដើរតាមវាសនាក្នុងខ្យល់ប្រៃ ជឿជាក់លើខ្លួនឯងនិងគ្មានអ្នកដទៃ បន្ទាប់ពីរកឃើញដី អ្នកនឹងរកឃើញជីវិតរស់នៅ គ្រប់យ៉ាងនឹងកន្លងផុតទៅ នៅពេលដែលពេលវេលាត្រឹមត្រូវ..»។
ក្បូនបណ្តែតលើទឹកតាមយថាកម្ម បាននាំខ្ញុំរសាត់ទៅកាត់ព្រៃរនាមនិងវាលទំនាប រហូតដល់ទីបំផុតវាបានឆ្លងចូលទៅក្នុងផ្លូវរូងក្រោមដីដែលរត់កាត់តាមជញ្ជាំងភ្នំ។
ខ្ញុំបានទម្លាក់មុខផ្កាប់ចុះទៅក្នុងទូក ក្នុងភាពងងឹតដោយមានអារម្មណ៍ថា ដំបូលប្រក់នៃក្បូនរបស់ខ្ញុំគឿងទើស។ ខ្ញុំនឹកឆ្ងល់ថាតើក្បូនរបស់ខ្ញុំនឹងជាប់គាំងជ្រៅនៅក្នុងភ្នំ លែងបានឃើញពន្លឺថ្ងៃម្តងទៀតឬយ៉ាងណា?
ខ្ញុំបែរបន់និងសន្លប់ រហូតដល់ពេលមួយត្រចៀករបស់ខ្ញុំបានពោរពេញដោយសំឡេងប្រកូក និងភ្នែកនេះទទួលបានពន្លឺពីស្ថានសួគ៌។
តាមពិត ក្បូនបានអណ្តែតតាមខ្យល់ ហើយចេញទៅក្នុងចំហទឹក ដែលទីនេះមានមនុស្សមួយចំនួនបានចោមព័ទ្ធហើយស្រែកហៅខ្ញុំ។
ម្នាក់ក្នុងចំណោមពួកគេបានគប់ខ្សែពួរមកឱ្យខ្ញុំចាប់ ហើយពួកគេបានទាញខ្ញុំយកទៅច្រាំងទន្លេ។
ខ្ញុំដួលទន់ដៃដោយអស់កម្លាំងខ្លាំងថែមទាំងស្តាប់ ពួកគេនិយាយភាសាថ្មីដែលខ្ញុំមិនយល់ រហូតដល់មានម្នាក់ក្រោយមកដល់គាត់ចេះនិយាយភាសាអារ៉ាប់។
ពួកគេជា កម្មករលីសែង។ គេនាំខ្ញុំនិងត្បូងដ៏មានតម្លៃដែលបានទុកនៅលើក្បូននោះទៅគាល់ស្តេចព្រោះនេះជាបទបញ្ញត្តិ។
នៅព្រះបរមរាជវាំង ខ្ញុំចូលគាល់ព្រះមហាក្សត្រនិងខ្ញុំបានថ្វាយឃ្លាំងទ្រព្យសម្បត្តិរបស់ខ្ញុំទុកជាអំណោយដល់ព្រះអង្គ ក្រោយមកខ្ញុំដឹងថាទ្រង់ជាព្រះករុណាព្រះមហាក្សត្រនៃប្រទេសស្រីលង្កា ហើយបានតំណាលទូលរឿងរបស់ខ្ញុំពីដើមដល់ចប់។ ពេលយកចិត្តទុកដាក់ពិចារណាហើយ ទ្រង់បានសួរខ្ញុំអំពីប្រទេសកំណើតរួច បានប្រកាសថា ខ្ញុំនេះជាមនុស្សឆ្លាតនិងមានចិត្តសីលទានគួរឱ្យសរសើរ។
ខ្ញុំបានរស់នៅក្នុងវាំងរបស់ស្ដេចស្រីលង្កាដោយកិត្តិយស រហូតដល់ថ្ងៃមួយខ្ញុំមានដំណឹងមកថា នឹងមានឈ្មួញមួយក្រុមចេញសំពៅមកដល់ទីនេះសំចតសុំបន្តផែទៅស្រុកបាស្ហា។
ស្តេចនគរស្រីលង្កាបានបង់ថ្លៃទិញកន្លែងមួយឱ្យខ្ញុំឡើងជិះទូកនោះបន្តទៅនគរទៅបាស្ហាជាមួយមហាអំណោយ រួមមានត្បូងទទឹមមួយកែវខ្ពស់ គជ់ដ៏មានតម្លៃ ស្បែកពស់ ទឹកអប់ដ៏មានក្លិនឈ្ងុយមួយតោន និងអ្នករបាំដ៏ស្រស់ស្អាតជាក្មេងស្រីបួននាក់។
នេះជាអ្វីដែលព្រះអល់ឡោះប្រទានខ្ញុំក្រោយការតស៊ូដែលទ្រង់បានសាកល្បង។ យើងបានជិះពៅក្រោមអាកាសធាតុនិងទិសខ្យល់ដ៏ត្រឹមត្រូវ ហើយសូមអរព្រះគុណដល់អល់ឡោះដែលបញ្ជាខ្យល់មេឃាបោកបក់ខ្ញុំវិលមកដល់ទីក្រុង Basrah វិញដោយសុវត្ថិភាព។ បន្ទាប់មក ខ្ញុំបាន អំណោយដល់មិត្តភក្តិនិងក្រុមគ្រួសាររបស់ខ្ញុំផ្ទាល់ ហើយបានផ្តល់ជំនួយដល់ជនក្រីក្រ ដោះលែងទាសករចាស់ៗ ហើយត្រលប់ទៅកាន់ជីវភាពពីមុន ម្ដងទៀតដែលមានភាពសុខស្រួលនិងបុណ្យបារមី។
នៅពេលដែល Sinbad បានបញ្ចប់ការនិទានរឿងនៃការធ្វើដំណើរទីប្រាំមួយរបស់គាត់ គាត់បានផ្តល់កាក់មាសមួយដល់បុរសលីសែងដែលតែងតែមកស្តាប់រឿងរ៉ាវតំណាល។
តមក ពួកគេបានយល់ព្រមចួបគ្នាម្តងទៀតនៅព្រឹកបន្ទាប់ ដើម្បីស្តាប់ការធ្វើដំណើរទីប្រាំពីរ និងជាំដំណើរផ្សេងព្រេងលើកចុងក្រោយនៃស៊ីនបាដអ្នកជំនួញសមុទ្រ។
ដំណើរផ្សងព្រេងលើកទី៧
បន្ទាប់ពីការត្រលប់មកវិញពីការធ្វើដំណើរទីប្រាំមួយរបស់ខ្ញុំ ដែលបាននាំមកផ្ទះវិញនូវអំណោយលើសលុបពីនគរស្រីលង្កា ខ្ញុំបានរស់នៅសោយសុខក្នុងបែបបទជីវិតចាស់ដូចពីមុនឡើងវិញ។
រហូតដល់ខ្ញុំនឹកធុញថប់ បួនឆ្នាំក្រោយមកក៏ចេញគំនិតចាប់ផ្ដើមចង់ជិះទូកទៅលេងសមុទ្រ ចេញទៅបរទេស បង្កើតមិត្តភក្ដិថ្មីៗក្នុងចំណោមពាណិជ្ជករដែលមានចិត្តដូចគ្នាទៀត។
ដូច្នេះ វាគ្មានអ្វីដែលអាចមករារាំងខ្ញុំក្នុងការប្រមូលទំនិញទៅកាន់កំពង់ផែ Basrah ទៀតនោះទេ។ ខ្ញុំបានរកឃើញក្រុមឈ្មួញមួយដែលមានកប៉ាល់ត្រៀមចេញទៅសមុទ្រ។ ខ្ញុំបានជិះទូកជាមួយពួកគេ រាប់អានមិត្តភក្តិថ្មី ហើយធ្វើដំណើរប្រកបដោយសុកភាពនិងសុវត្ថិភាព ជាមួយនឹងខ្យល់អាកាសដ៏សមរម្យ។
នៅទីបំផុត យើងបានមកដល់ទីក្រុងមួយឈ្មោះថា Madinat-al-Sin ជាកន្លែងដែលយើងធ្វើអាជីវកម្មបានល្អឡើងៗ។ បន្ទាប់រយៈពេលពីរខែក្រោយមក យើងចេញដំណើរពីទីក្រុងនោះមកវិញ ខ្យល់អាកាសល្អស្ងប់រលក។
ប៉ុន្តែចេញបានកណ្តាលសមុទ្រ ស្រាប់តែពើបនឹងព្យុះចម្លែកមួយ បានបក់បោកមកលើក្បាលទូកយ៉ាងខ្លាំង ហើយភ្លៀងក៏ចាប់ធ្លាក់កញ្ជ្រោលបោកបាច។
ទំនិញរបស់យើងត្រូវ បានគ្របដណ្ដប់ដោយផ្ទាំងក្រណាត់ ហើយគ្រប់គ្នាបានអធិដ្ឋានទៅកាន់ព្រះដ៏មានមហិទ្ធិឫទ្ធិ ដើម្បីសង្គ្រោះយើងពីគ្រោះថ្នាក់ជាយថាហេតុ។
ពេលព្យុះបានកន្លងផុតទៅ ប្រធានក្រុមនាវិកបានឡើងទៅលើកំពូលបង្គោល។ គាត់មើលស្តាំ និងឆ្វេង រួចចាប់ផ្តើមវាយថ្ងាសខ្លួនឯងដោយកណ្តាប់ដៃប៉ូកៗរបៀបមនុស្សហៀបនឹងស្លាប់។
ពេលនោះហើយ គាត់បានប្រកាសអាសន្នថា ខ្យល់បានជម្រុញយើងអណ្តែតមកកាន់ជ្រុងឆ្ងាយបំផុតនៃពិភពលោកដែលគ្មានអ្នកណាដឹងនិងស្គាល់។
គាត់យកសៀវភៅមួយក្បាលមកអានទាំងស្រក់ទឹកភ្នែក។ នៅទីបំផុតគាត់ បាននិយាយមកកាន់យើងថា សៀវភៅនេះពិពណ៌នាយ៉ាងច្បាស់ពីកន្លែងដែលយើងនឹងរសាត់ទៅដល់។ វាជាកន្លែងដែលគ្មានអ្នករត់គេចរួចទេ យើងគ្រប់គ្នាប្រាកដជាស្លាប់នៅទីនេះ។
បុរាណបានដាក់ឈ្មោះទីនេះថា ជានគរសមុទ្រនៃស្តេចនាគរាជ ព្រោះនៅទីនេះរាជនគរស្តេចនាគ ដែលកកើតទឹកដីមកត្រូវបានបង្កប់នៅក្រោមរលក។ សត្វនាគរាជសមុទ្រដ៏ធំ ដែលតាំងទីរស់នៅទីនេះច្រើនសម័យកាលមក គឺមានចចាមអារ៉ាមថាមានមាត់ ធំណាស់អាចលេបស៊ីកប៉ាល់ទាំងមូលបាន។
ពេលបានឮហើយ ពួកយើងគ្រប់គ្នាពេញដោយការភ័យខ្លាចនិងចាប់ផ្ដើមដាក់ព្រលឹងព្រលះថ្វាយចំពោះព្រះអល់ឡោះ។ មិនយូរប៉ុន្មាន យើងបានឮសូរគ្រហឹមដូចផ្គរលាន់ ហើយត្រីដ៏ធំមួយក្បាលលេចឡើងមកនឹងបានហែលស្លេវតម្រង់មករកសំពៅយើង។ វាមានខ្នងទូងធំ កម្ពស់ដូចកូនភ្នំ ហើយមានល្បឿនលឿនជាងសំពៅដប់ដង។ ពេលយើងកំពុងត្រៀមខ្លួនសម្រាប់ការស្លាប់ក្នុងពោះត្រីយក្ស ស្រាប់តែលេចសត្វពស់វែងធំដ៏សាហាវមួយក្បាលហក់មកត្របាក់ត្រីជាអាហារ។
សត្វខ្នាតយក្សទាំងពីរ ដ្បិតតែមិនទាន់បានធ្វើចលនាវាយប្រហារមកលើសំពៅយើង ក៏ពួកយើងនៅទីនេះ អាចនឹងស្លាប់ដោយការភ័យខ្លាចលេចនោម។
មិនទាន់ចប់ទៀត ប្រទូសរ៉ាយបានបង្កជាសំឡេងនិងកំរោលរលក ផ្អើលហៅសត្វទីបីលេចចេញពីក្នុងជម្រៅមហាសាគរ។ សត្វទីបីមានខ្លួនជាមហាពស់ មាត់និងក្បាលជាតោ។ វាមិនរវល់នឹងសត្វទាំងពីរមុនទេ បែរជាបើកមាត់តម្រង់មកត្រងសំពៅរបស់យើង។ ពួកយើងស្រែកឱបគ្នា ក្រឡេកមើលទៅថ្គាមរបស់វា ដែលធំជាងទ្វារទីក្រុងទៅទៀតតើយើងអាចគេចផុតរបៀបណាបាន?
ខ្ញុំបានបួងសួងអង្វរព្រះដ៏មានមហិទ្ធិឫទ្ធិឱ្យជួយជាចុងក្រោយមុនពេលខ្យល់ពីមាត់សត្វបានបក់បោកមកលើកប៉ាល់ឱ្យប៉ើងងើបឡើងពីក្នុងវាលទឹក ហើយបោកខ្ជោលធ្លាក់ទៅលើឆ្នេរថ្មប៉ប្រះទឹកបំបែកកម្ចាយជាបំណែកៗ។
យើងគ្រប់គ្នានិងអ្វីៗទាំងអស់នៅលើសំពៅបានធ្លាក់ចូលទៅក្នុងសមុទ្រវិញ ខណៈខ្ញុំជិះលើបន្ទះក្តារដោយជើងទធាក់ទៅមុខដូចសេះ។ ខ្យល់និងទឹកកំពុងប្រជែងស្ទង់កម្លាំងរបស់លេងខ្ញុំដោយបានបោះរាងកាយខ្ញុំឡើងចុះ ចុះឡើងឈ្លក់ទឹកង៉ាង។
ពេលនោះហើយ ខ្ញុំស្រែកយំតិះដៀលខ្លួនឯងថា៖
«អូ ស៊ីនបាដ អូស៊ាម៉ាន! ឯងមិនបានរៀនចាំពីមេរៀននៃការរងទុក្ខនិងការលំបាកមុនៗទេ! ឯងបានស្បថថានឹងបោះបង់ការដើរសមុទ្រ ប៉ុន្តែឯងបានបំពាន! ឯងសមនឹងទទួលរងទុក្ខវេទនាសាដើមដដែលជាដដែល! ការលោភលន់នេះឯង ជាហេតុនាំឱ្យឯងស្លាប់ទាំងមិនទាន់ដល់ពេល!»
មិនយូរប៉ុន្មាន ខ្ញុំប្រមូលអារម្មណ៍របស់ខ្ញុំមកវិញ ហើយគិតថា៖
«ប្រសិនលើកនេះ អាចឆ្លងផុត! ខ្ញុំប្រែចិត្តដោយស្មោះឥតវៀចវេចំពោះព្រះអល់ឡោះដ៏ខ្ពង់ខ្ពស់ទៀតទេ! តណ្ហារបស់ខ្ញុំសម្រាប់ការចំណេញនិងការបណ្តាក់ទុនខ្ញុំនឹងដាក់ចុះ មិនធ្វើដំណើរជួញប្រែតាមសមុទ្រទៀតជាដាច់ខាត សូម្បីតែគិតឬក្នុងសុបិន»។
ខ្ញុំបានបន្តបណ្តែតខ្លួនធ្វើបែបនេះអស់រយៈពេលមួយយប់មួយថ្ងៃស្រេកឃ្លាននិងខ្សោះទឹករហូតដល់ចុងក្រោយខ្ញុំបានទើរទៅដល់កោះមួយថ្មីដែលខ្ញុំមិនដែលស្គាល់ឬធ្លាប់ឃើញ។
ទីនោះខ្ញុំបានឃើញឈើតម្រុយនៃសម្បកផ្លែឈើ។ ជាការពិតណាស់ ប្រសិនទីណាមានឈើហូបផ្លែ ប្រាកដជាមានប្រភពទឹកសាបមិនខាន ពុំនោះទេដំណាំរស់មិនបានទេ។ ខ្ញុំបានដើររហូតដល់រកឃើញដើមពុទ្រាតូចៗ ខ្លះមានជាតិជូរ ខ្លះផ្អែមនិងខ្លះចត់។ ក្រោយពីចម្អែតហើយ ខ្ញុំក៏បន្តតាមសន្ធឹកខ្យល់រហូតដល់រកឃើញដៃទន្លេដ៏ខៀវស្រងាត់មានទឹកស្អាតឆ្វាំងនិងរសជាតិទឹកផ្អែម។ ក្បែរនោះមានដើមឈើបែកមែកសាខាដែលផ្ទុកដោយផ្លែឈើធំៗ សាច់វាទន់ និងផ្អែមក្រអូបចាប់មាត់ ដែលខ្ញុំមិនធ្លាប់ស្គាល់ឬបានភ្លក់ពីមុនមកឡើយ។
ខ្ញុំបានចម្អែតនិងសម្រាកគួរសមរួចរាល់ ក៏រកមធ្យោបាយចងឈើប្រណីតមួយចំនួនធ្វើក្បូនដោយខ្លួនឯង។ ជាច្រើនថ្ងៃដែលខ្ញុំដេកនៅលើទូករបស់ខ្ញុំ រង់ចាំទម្រាំកម្លាំងខ្យល់មកដល់ខ្ញុំក៏ចាប់ផ្តើមរុញក្បូនតាមបណ្តោយនោះចាកចេញ។ ជាច្រើនថ្ងៃដែលផ្លែឈើខ្ញុំបេះមកតាមបានហូបអស់ ខ្ញុំដេកលើនោះបណ្តែតកណ្តាលទន្លេល្ហល្ហេវគ្មានទិសតំបន់ មិនឃើញភូមិករឬទូកនេសាទ សូម្បីតែមួយ ហើយអស់សង្ឃឹមយ៉ាងខ្លាំងនៅពេលដែលក្រពះទទេ។
ខ្ញុំយល់ថាក្បូននេះឯងជាទីបញ្ចប់របស់ខ្ញុំ។ ទោះសល់ដង្ហើមមួយក៏ខ្ញុំនៅតែបួងសួង។ មិនយូរប៉ុន្មាន ខ្ញុំកត់សម្គាល់ឃើញអ្នកនេសាទ ទម្លាក់អួននៅកន្ទុយភ្នែកចម្ងាយឆ្ងាយ។
ត្រេកអរណាស់ បានស្រែកប្រកូករហូតគាត់ឃើញខ្ញុំ ហើយចែវមកក្បែរជួយទាញខ្ញុំចូលច្រាំង។ បុរសនោះបានគ្រាខ្ញុំឱ្យបរិភោគនំនិងទឹកឃ្មុំរបស់គាត់ រហូតដល់ខ្ញុំមានកម្លាំងបានសម្រាករៀបរាប់គ្រប់យ៉ាង ហើយគាត់បានសន្យាថានឹងជួយខ្ញុំ។
ស្អែកឡើងយើងបានចែវមកដល់ភូមិប្រជុំជនមួយប្របនឹងច្រាំងទន្លេ កំពង់ផែដូចជាកូនទីក្រុងដ៏អាថ៌កំបាំងអស្ចារ្យមួយលាក់ខ្លួន។
បុរសវ័យចំណាស់ម្នាក់ដែលជាថៅកែទិញត្រីបានដឹងបន្តនូវរឿងកម្សត់របស់ខ្ញុំក៏មករាក់ទាក់ ហើយនាំខ្ញុំទៅផ្សាររកសម្លៀកបំពាក់ដ៏ល្អមួយឈុតឱ្យខ្ញុំប្តូរ ហើយបានបង់ប្រាក់ឱ្យខ្ញុំទៅលេងកន្លែងងូតទឹកស្ទីមក្តៅនិងចំហុយ។ បន្ទាប់មកគាត់បានអញ្ជើញខ្ញុំទៅផ្ទះរបស់គាត់ ហើយរៀបចំអាហារដ៏បរិបូរណ៍ទទួលខ្ញុំ។
នៅពេលល្ងាច ខ្ញុំចូលសម្រាកក្នុងបន្ទប់ហើយស្នាក់នៅទីនោះរយៈពេលបីថ្ងៃហូបឆ្ងាញ់និងបំប៉នថ្នាំ ធ្វើឱ្យសុខភាពកាយនិងចិត្តរបស់ខ្ញុំបានប្រសើរឡើងសន្សឹមៗ។
នៅថ្ងៃទីបួនម្ចាស់ផ្ទះរបស់ខ្ញុំបានមករកខ្ញុំហើយបបួលខ្ញុំទៅលេងខាងក្រៅដើម្បីស្រូបយកអាកាសបរិសុទ្ធ។ ខ្ញុំងឿងឆ្ងល់ ព្រោះតាមការពិតគាត់យកខ្ញុំមកទីប្រជុំជនទៅវិញ។ ខ្ញុំបានបដិសេធថា ខ្ញុំមិនមានប្រាក់សូម្បីតែមួយសេនណានិងថែមបាត់បង់ទំនិញទាំងអស់នៅក្នុងការលិចកប៉ាល់។
ទោះជាខ្ញុំប្រកែកយ៉ាងណាក៏គាត់នៅតែប្រាប់ខ្ញុំថាកុំបារម្ភអី។ ទៅដល់ផ្សារកាលណា ខ្ញុំបានឃើញទាសកររបស់គាត់ឈរពពាយនាយលក់ក្បូនរបស់ខ្ញុំ ហើយនិទានលម្អិតអំពីរឿងរ៉ាវនៃដំណើរផ្សងព្រេងរបស់ខ្ញុំ។ ពួកគេទុកថា នេះជាក្បូនព្រះនាំសំណាងឱ្យបានរស់មិនចេះស្លាប់ម្តងហើយម្តងទៀតដល់ខ្ញុំ ក៏មានអ្នកផ្តើមចង់បាននិងដេញថ្លៃយកទុក។
បុរសម្នាក់បានផ្តល់តម្លៃ១០០តម្លឹងមាស ហើយក្រោយមកការដេញថ្លៃឡើងដល់៣៥០តម្លឹងធ្វើឱ្យខ្ញុំស្រឡាំងកាំងស្ងើចនឹងគំនិតជ្រោមជ្រែងរបស់ព្រះអល់ឡោះ។
ក្បូននេះមិនមានតម្លៃសោះទេក្នុងគំនិតរបស់ខ្ញុំ។ ដូច្នេះហើយបានថា មនុស្សយើងគិតបែបណា គ្រប់យ៉ាងបានប្រែប្រួលទៅជាបែបនោះមែន។
ពេលគេគិតថា វាជារបស់សំណាង វាក៏ក្លាយជាមានតម្លៃជាងរតនៈវត្ថុ។
យើងត្រលប់មកផ្ទះវិញ គាត់មានប្រសាសន៍មកខ្ញុំថា៖
«ខ្ញុំចាស់ណាស់ហើយគ្មានកូនប្រុសទេ ប៉ុន្តែខ្ញុំមានកូនស្រីម្នាក់ដែលនៅក្មេង ហើយខ្ញុំត្រៀមរកមនុស្សល្អមានសំណាងម្នាក់មករៀបការឱ្យនាង។ ក្នុងជីវិតដ៏វែងឆ្ងាយរបស់ខ្ញុំ ខ្ញុំមិនដែលឮពីបុរសណាម្នាក់ ដែលតែងតែបានរួចរស់ជីវិតលើសពីការលិចកប៉ាល់ច្រើនលើកទេ តើអ្នកនឹងផ្តល់កិត្តិយសឱ្យខ្ញុំក្នុងការធ្វើជាកូនប្រសាខ្ញុំដែរ?»
ខ្ញុំនៅស្ងៀមហើយមិនឆ្លើយតបទេ ព្រោះចិត្តសប្បុរសរបស់គាត់អស្ចារ្យណាស់។ ប៉ុន្តែគាត់បានបន្តច្បាស់លាស់ហើយនិយាយថា គាត់មិនប្រាថ្នាអ្វីធំជាងនេះទេមុន ពេលស្លាប់ទៅតាមធម្មជាតិ។
ចុងក្រោយខ្ញុំក៏ទទួលយកសំណើរនោះ។ ខ្ញុំបានព្រមរៀបការជាមួយកូនស្រីតែមួយគត់របស់គាត់ តាមពិធីមង្គលការដ៏ថ្លៃថ្នូរមួយ។
ថ្ងៃនោះ ខ្ញុំបានឃើញនាងជាលើកដំបូងទើបដឹងថា តាមពិតនាងជានារីមានសម្រស់និងចរិយាសម្បត្តិល្អឥតខ្ចោះ។ ពេលនាងតុបតែងជាមួយសម្លៀកបំពាក់មង្គលដ៏សម្បូរបែប គ្របដណ្ដប់ដោយគ្រឿងអលង្ការដ៏មានតម្លៃនិងត្បូងពេជ្រ នាងបានក្លាយជាទេពអប្សររបស់ខ្ញុំ។
យើងរស់នៅជាមួយគ្នាយ៉ាងមានសុភមង្គល រយៈពេលជាច្រើនឆ្នាំ រហូតដល់ឪពុករបស់នាងបានឆ្លងផុតទៅកាន់ពិភពលោកមួយទៀត…។
បន្ទាប់ពីខ្ញុំក្លាយជាមេគ្រួសារ ខ្ញុំចាប់ផ្ដើមទាក់ទងស្គាល់គ្នាជាមួយអ្នកជំនួញថ្មីៗមកពីទីក្រុងផ្សេងៗទៀតឱ្យកាន់តែជិតស្និទ្ធ។
រយៈពេលនោះខ្ញុំសេពគប់ជាមួយអ្នកចំណូលថ្មីម្នាក់។ ក្រោយយប់មួយដែលខ្ញុំនិងគេផឹកស្រាស្រវឹងខ្ញុំដឹងខ្លួនពាក់កណ្តាលក៏លបមើលឃើញថា ម្នាក់នោះគេមានអាថ៌កំបាំង។
នៅពេលគេស្រែកបាលី ទម្រង់រាងកាយបស់គេបានផ្លាស់ប្តូរ ទៅជាបក្សីធំមួយអាចហោះបាន។ ខ្ញុំស្រឡាំងកាំងជាខ្លាំងដំបូងស្មានថាគេជាគ្រូធ្មប់ តែក្រោយមកគេបានសារភាពប្រាប់ថា នេះជាបណ្តសានិងជាតំណនៃត្រកូលគេ។
ខ្ញុំដេកមិនសុខ ចេះតេគិតថាប្រសិនថ្ងៃណាមួយខ្ញុំអាចចេះបាលីនោះ ខ្ញុំប្រាកដជាអាចហោះហើរបានគ្រប់ទីកន្លែងមិនខាន?
ថ្ងៃមួយខ្ញុំចិញ្ចឹមចិត្តតាមសួរគាត់ថា៖
«ស្រែកឡើងមិត្តហើយ សូមយកខ្ញុំដាក់លើខ្នងទៅជាមួយផង ដើម្បីឱ្យខ្ញុំដឹងថាវាមានអារម្មណ៍យ៉ាងណាពេលហោះខ្ពស់!»
មិត្តម្នាក់នោះបានប្រកែកញ៉ាញហើយឆ្លើយថា៖
«សំណូមពរនេះ មិនអាចទៅរួចទេ ព្រោះយើងមានតំណមតឹងដែលមិត្តមិនអាចតមបាន!»
គេបានចាកចេញមិននិយាយដល់រឿងនោះ ប៉ុន្តែចិត្តចង់ចេះនេះ ខ្ញុំមិនព្រមឈប់ត្រឹមនោះឡើយ។ ខ្ញុំតែងតែជឿថា ថ្ងៃណាមួយខ្ញុំនឹងសួរគាត់ដល់តែចេញ។
យប់មួយខ្ញុំបានបង្អកគាត់ ហើយចុងក្រោយគាត់ក៏ព្រមប្រាប់ពាក្យនោះ។
ខ្ញុំសូត្របែបណាក៏មិនកែប្រែរូបរាងទៅជាបក្សីសត្វបានដដែល អ៊ីចឹងហើយ ខ្ញុំបានឡើងលើខ្នងគាត់ ហើយបញ្ជាថា គាត់ត្រូវយកខ្ញុំទៅខ្ពស់រហូតដល់ខ្ញុំបានឃើញផែនដីនៅក្រោម។
ពេលនោះមិត្តខ្ញុំពិតជាចងបង្អួតណាស់នូវសមត្ថភាពរបស់គាត់ ក៏យល់ព្រមនាំខ្ញុំហោះឡើងទៅលើមេឃ តែបានដាក់បម្រាមតឹងរឹងមិនឱ្យខ្ញុំនិយាយសូម្បីមួយពាក្យណាឡើយពេលយើងកំពុងហោះ។
ខ្ញុំបានស្បថនឹងយល់ព្រមតាមគាត់គ្រប់យ៉ាង ទន្ទេញបម្រាមជានិច្ចលុះណាមិត្តខ្ញុំទុកចិត្តនឹងព្រមហោះឡើង។
មកដល់លើអាកាស ខ្ញុំរំភើបចិត្តជាខ្លាំង។ ខ្ញុំនឹកស្រុកកំណើត នឹកផ្ទះ ហើយបានស្រែកឡើងថា៖
«សូមសរសើរដល់ព្រះអល់ឡោះក្នុងកិច្ចកសាងភាពល្អឥតខ្ចោះនេះ!»
រំពេចនោះ ភ្លើងដ៏ធំមួយបានធ្លាក់មកពីស្ថានសួគ៌ ហើយដុតសត្វស្លាបឱ្យអន្តរធាន ធ្លាក់បាត់ខ្ចាត់ខ្ចាយនិងទម្លាក់ខ្ញុំទៅលើជួរភ្នំមួយ។
នៅទីនោះ ខ្ញុំបានធ្លាក់លើផ្ទៃបឹងហើយស្រវាហែលឡើងមក ក៏ជួបនឹងអាមាត្រពីរនាក់ មុខក្រម៉ូវ ដៃកាន់ក្តាប់ដំបងមាសធំដូចគ្នា។
ខ្ញុំបានសំពះពួកគេហើយសួរថា ទីនេះជាកន្លែងណា ហើយពួកគេទាំងពីរជានរណា។
«យើងជាអ្នកបំរើរបស់ព្រះអល់ឡោះដ៏ខ្ពង់ខ្ពស់!»
ឆ្លើយតបរួចម្នាក់ក្នុងចំណោមនោះបានឱ្យដំបងមាសមួយមកខ្ញុំ ហើយដើរបណ្តើរខ្ញុំតាមជួរភ្នំសំដៅមាត់ល្អាងធំនិងជ្រៅ។ នៅកន្លែងនោះ យើងបានឮសម្រែករបស់បុរសម្នាក់ឡូឡាចេញមកពីជម្រៅឆ្ងាយថា៖
«អ្នកណានៅខាងក្រៅ! សូមជួយសង្រ្គោះខ្ញុំផងចុះ! ព្រះអល់ឡោះនឹងជួយសង្គ្រោះអ្នកពីគ្រប់បញ្ហាទាំងអស់!»
ពេលនោះ យើងបានឃើញរឿងរន្ធត់មួយ គឺសត្វពស់ធំមួយដែនរីកមាឌចម្លែកកំពុងលេបមនុស្សពាក់កណ្តាលទៅហើយ។ ក្បាលនិងផ្នែកខាងលើនៃខ្លួនគាត់នៅលៀនចេញពីមាត់វា បានជាគាត់ ស្រែករកខ្ញុំឱ្យជួយ។
ខ្ញុំប្រញាប់ចុះទៅវាយក្បាលពស់នោះដោយដំបងមាសរបស់ខ្ញុំ វាយហើយវាយទៀតមិនដាក់ដៃរហូតដល់វាទ្រាំលែងបានក៏ព្រមខ្ជាក់ជនរងគ្រោះហើយរត់គេចខ្លួនទៅក្នុងទីងងឹតបាត់។
ដោយខ្ញុំបានជួយស្អំគាត់និងមើលគាត់ឱ្យសម្រាកបន្តិចបានធូរស្បើយ ពួកយើងក៏បានបន្តដំណើរជាមួយគ្នាទៅមុខជាមួយគ្នាស្វែងរកទីប្រជុំជន។ ទីបំផុតយើងបានប្រទះឃើញមិត្តខ្ញុំដែលចេះបាលីហោះ កំពុងដេកសន្លប់ពេលធ្លាក់ពីលើមេឃ។
យើងបានជួយសង្គ្រោះគាត់មួយយប់មួយថ្ងៃទម្រាំសះរបួស។ បុរសបក្សីយល់ព្រមដឹកពួកខ្ញុំវិលទៅវិញ។ ប្រពន្ធខ្ញុំបានចេញមកទទួលខ្ញុំដោយអំណររីករាយនឹងសុវត្ថិភាពរបស់ខ្ញុំនេះ។
ទោះបីជាយ៉ាងណា យប់នោះពេលចូលនិន្ទ្រាភរិយាខ្ញុំបានខ្សឹបប្រាប់ខ្ញុំឱ្យប្រយ័ត្ននឹងការហោះហើរជាមួយមនុស្សបក្សី ព្រោះពួកគេមានទំនាក់ទំនងនឹងអារក្ស ហើយមិនដឹងថា អាចហោះឡើងនិងធ្លាក់មកវិញពេលណាទេ។ គ្មានអ្នកណាអាចបិទមាត់មិននិយាយអ្វីរហូតលើមេឃពេលកំពុងរំភើបឡើយ។
ដូច្នេះ ដោយដឹងថាខ្លួនឯងតែងតែមានចរិតរឹងរូស ចិញ្ចឹមចិត្តប៉ុនប៉ងយ៉ាងមានះ ខ្ញុំមិនមានបំណងចង់ស្នាក់នៅក្នុងទីក្រុងនេះទៀតទេ ដូច្នេះហើយពួកយើងបានសម្រេចចិត្តថា នឹងលក់ទ្រព្យសម្បត្តិរបស់យើងទាំងអស់ហើយបានឡើងជិះកប៉ាល់ត្រលប់ទៅទីក្រុង Baghdad វិញ។
យើងធ្វើដំណើរដោយសុវត្ថិភាពទៅកាន់ទីក្រុង Baghdad ហើយត្រូវបានមកទទួលនិងចោមព័ទ្ធ ដោយមិត្តភក្តិនិងក្រុមគ្រួសាររបស់ខ្ញុំ។
ខ្ញុំបានសន្យាចំពោះព្រះអល់ឡោះដ៏ខ្ពង់ខ្ពស់បំផុត ថានឹងមិនធ្វើដំណើរទៀតទេ ក្រោយការធ្វើដំណើរលើកទីប្រាំពីរនិងជាលើកចុងក្រោយនេះ បានបង្ហាញឱ្យខ្ញុំឃើញពីផែនដីនិងអាថ៌កំបាំងលើលោកគ្រប់គ្រាន់ហើយ។
សេដ្ឋី Sinbad the Sailor បាននិយាយទៅកាន់ Sinbad ជាអ្នកលីសែងជាចុងក្រោយថា៖
«ឥឡូវនេះអ្នកបានឮពីគ្រោះថ្នាក់និងការលំបាកដែលខ្ញុំបានឆ្លងកាត់ហើយ!»
បុរសអ្នកលីសែងបានជូតទឹកភ្នែកហើយ និយាយតបវិញថា៖
«អល់ឡោះប្រទានពរដល់អ្នក! ឱ! លោកម្ចាស់របស់ខ្ញុំអត់ទោសឱ្យខ្ញុំចំពោះពាក្យដែលលើកឡើងដោយក្តីច្រណែនពីមុននោះផង!»
សេដ្ឋីបានទទួលឱ្យស៊ីនបាដលីសែងមករស់នៅជាមួយគាត់ហើយយល់ព្រមជួយឱ្យគាត់រស់នៅមិនខ្វល់ខ្វាយអ្វីទៀត។
Sinbads ទាំងពីរបានក្លាយជាមិត្តនឹងគ្នា ហើយតែងតែរីករាយនឹងជីវិតចែករំលែកសាច់រឿងដ៏រីករាយរហូតដល់ថ្ងៃចុងក្រោយរបស់ពួកគេ។
Post a Comment